13/04/2019 - ՆԻՍ

Ս. Աստուածածին եկեղեցին վերօծելու շտապողականութիւնը


DR

2019-ի Զատկուան տօներուն մեծագոյն նորութիւնը Նիսի Ս. Աստուածածին եկեղեցւոյ կրօնական ընկերակցութեան կողմէ Ֆրանսայի թեմին միանալու ցանկութեան իրականացման համար առնուած քայլն էր, որ 7 Ապրիլ 2019-ին ընկերակցութեան Արտակարգ ընդհանուր ժողովը վաւերացուցած է։ Ըստ երեւոյթին Ս. Աստուածածին եկեղեցւոյ վարչութիւնը վերջապէս հասկցաւ որ եթէ կ՚ուզէ շարունակել մնալ Հայ առաքելական՝ պէտք է կրօնական ընկերակցութեան կանոնադրութիւնը պատշաճեցնէ թեմի սահմանած կանոնադրութեան։

Այսօր, եթէ հարց տրուի թէ վասն ինչի՞ մղուեցաւ այս պայքարը, ինչո՞ւ 2006-2007-էն ի վեր Ս. Աստուածածին եկեղեցւոյ վարչութիւնը յամառօրէն հակառակեցաւ Հայաստանեայց առաքելական եկեղեցւոյ եւ ընդհանրապէս քրիստոնէական ու ժողովրդավարական ամենէն տարրական սկզբունքներուն, ինչպէս՝ վարչական ընտրութիւններուն անհատական թեկնածութեան առաջադրանքին եւ հոգեւոր հովիւի հանդէպ յարգանքին ... Հարցումը կը մնայ անպատասխան։ Բայց պէտք է ընդունիլ որ ճամբուն վրայ կոտրած կուժերը շատ եղան՝ դատավարութիւններ, հոգեւոր հովիւի աւանդատանուէն վտարում, ամբաստանական նամակներ ուղղուած ոստիկանապետին, Ֆրանսայի հանրապետութեան նախագահին ...

Տակաւին, շատ յստակ չէ թէ որո՞նք են համաձայնութեան գլխաւոր եզրերը։ Այս զարգացումները տեղի կ'ունենան Հայր Վահան Եպս. Յովհաննէսեանի առաջնորդութեամբ:

Սակայն, մէկ բան յստակ է, որ այսօր Նիսի Հայ Առաքելական համայնքը, հակառակ Ս.Աստուածածին եկեղեցւոյ վարչութեան Հայ առաքելական հօտին վերադառնալու որոշումին, կը մնայ պառակտուած։ Փաստօրէն Նիսը պիտի ունենայ երկու ծուխ։ Ս. Աստուածածնի եկեղեցւոյ «վերամիացած» ծուխը եւ Գարեգին Բ. կաթողիկոսի օրհնութեամբ հիմնադրուած ծուխը, որ հաշտութեան գործընթացին մէջ մնացած է բոլորովին անտեսուած։ Եւ այսօր Նիսի Հայ առաքելական համայնքը հակառակ հռչակուած հաշտութեան, այո,՛ կը մնայ պառակտուած։

Նկատելի է եւ անբացատրելի այն շտապողականութիւնը, որով Թեմական իշխանութիւնները եւ նոյնիսկ Մայր Աթոռը կը ցուցաբերէ վերօծելու Ս. Աստուածածին եկեղեցին Ծաղկազարդի տօնին առթիւ, հազիւ շաբաթ մը անց Արտակարգ ընդհանուր ժողովի գումարումէն։ Շշուկներ կը շրջին որ իբր թէ այս կարգադրութեան ետին կանգնած է Հայաստանի կառավարութիւնը, որուն կողմէ ուղղորդուած է այս գործընթացը։ Սակայն, Ֆրանսայի մէջ ՀՀ դեսպանութիւնը վստահեցուց որ ՀՀ իշխանութիւնները շահագրգռուած են Սփիւռքի մէջ համերաշխ մթնոլորտի ամրապնդումով, սակայն անոնք բնաւ չեն ցանկար միջամտել համայնքային ներքին գործերուն եւ անթոյլատրելի կը գտնեն ՀՀ իշխանութիւններու անուան շահարկումը։


Այս առթիւ Հայաստանի հանրապետութեան դեսպանութեան տուած պատասխանը «Նոր Յառաջ»ի հարցումին.

«Նոր Յառաջ» - Տիկին Տոլմաջեան, վերջին շրջանին Ֆրանսիայի հայ համայնքի ուշադրութեան կեդրոնին էր Նիսի Ս. Աստուածածին հայկական եկեղեցւոյ շուրջ ծաոալուող նորութիւնները: Կարգ մը համայնքային շրջանակներու համար մտահոգութիւն է, երբ աշխարհիկ և հոգևորական տարբեր շահագրգիռ կողմեր Նիսի հայկական Սբ. Աստուածածին եկեղեցւոյ ապրիլի 14-ին համար նախատեսուած վերօծումը կը ներկայացնեն որպէս ՀՀ իշխանութիւններու կողմէն թելադրուած գործընթաց: Կրնա՞ք մեկնաբանել իրադրութիւնը։

Դեսպանուհի - Կարող եմ վստահեցնել, որ Հայաստանի իշխանութիւնները տեղեկացուած են և մշտապէս հետևում են Սփիւռքում տեղի ունեցող զարգացումներին, շահագրգռգուած են համերաշխութեան մթնոլորտի ամրապնդմամբ՝ առանց միջամտելու համայնքային տիրոյթում գտնուող հարցերին: Այս համատեքստում, ՀՀ իշխանութիւնների անուան ցանկացած շահարկում անթոյլատրելի է:

Partager
Imprimer
Dernière mise à jour : 13/04/2019 18:48 
Hamasyan 29 novembre

 
Nouveautés boutique
Archives
NH Hebdo N° 177 - 14/11/2019
 
NH Hebdo N° 176 - 07/11/2019
 
NH Hebdo N° 175 - 31/10/2019
 
NH Hebdo N° 174 - 24/10/2019
 
NH Hebdo N° 173 - 17/10/2019