Մայր Աթոռ Սուրբ Էջմիածինը Հոկտեմբեր 21-ին հրապարակած յայտարարութեամբ անդրադարձած է Թրքական պետութիւններու կազմակերպութեան կրօնական առաջնորդներու երրորդ հանդիպումին՝ Կովկասի մահմետականներու վարչութեան նախագահ Շեյխ-ուլ-իսլամ Ալլահշուքիւր Փաշազատէի կողմէ մասնաւորապէս ղարաբաղեան հակամարտութեան առնչութեամբ հնչեցուած յայտարութիւններուն եւ դատողություններուն՝ զանոնք յերիւրածոյ ու նենգափոխիչ համարելով։

Մայր Աթոռ Սուրբ Էջմիածնի յայտարարութեան մէջ նշուած է.-

«Հոկտեմբերի 20-ին Թիւրքական պետութիւնների կազմակերպութեան կրօնական առաջնորդների երրորդ հանդիպմանը Բաքւում, որը շարունակուեց գրաւուած Շուշիում, Կովկասի մահմեդականների վարչութեան նախագահ Շէյխ-ուլ-իսլամ Ալլահշուքիւր Փաշազադէի կողմից հերթական անգամ հնչեցուել են յերիւրական ու նենգափոխիչ յայտարութիւններ եւ դատողութիւններ ղարաբաղեան հակամարտութեան խնդրի, ցեղային զտումների, թիւրք-իսլամական մշակութային-հոգեւոր ժառանգութեան ոչնչացման, սրբավայրերի իւրացման, ադրբեջանական խաղաղասիրութեան եւ հայկական վրէժխնդրութեան վերաբերեալ, որոնց առնչութեամբ հայկական պետական եւ հոգեւոր պատկան կառոյցների կողմից բազմիցս տրուել եւ այսօր էլ շարունակաբար տրւում են պատասխաններ եւ լուսաբանութիւններ: Ադրբեջանի հոգեւոր առաջնորդը չի խորշել անգամ Հայոց եկեղեցուն մեղադրանքներ հասցէագրել եւ կեղծ վերագրումների համածիրի մէջ կոչ յղել Սուրբ Էջմիածնին եւ ցուցումներ` մեր “ժողովրդին ոչ թէ նոր արհաւիրքներ, այլ փրկութիւն բերող քայլերի առաջնորդել”-ու: 

Տարօրինակ է, որ 2020 թուականին Արցախի ժողովրդի նկատմամբ Ադրբեջանի սանձնազերծած պատերազմից եւ իրագործած անմարդկային դաժանութիւններից յետոյ Շէյխ-ուլ-իսլամ Ալլահշուքիւր Փաշազադէի հրահրիչ խօսոյթը բնաւ չի փոխուել: Ժողովուրդների խաղաղ գոյակցութիւնը իբրեւ թէ կարեւորող Կովկասի մահմեդականների վարչութեան նախագահը, հակառակ հոգեւոր առաջնորդների եռակողմ հանդիպումներում որդեգրուած ուղերձների ոգուն, նոյն ժամանակ լուռ է Ադրբեջանի շարունակուող յարձակման, ռազմատենչութեան եւ հայատեացութեան, ՀՀ ինքնիշխան տարածք ներխուժումների, սահմաններին ամէնօրեայ սադրանքների, խաղաղ բնակավայրերը գնդակոծելու, հայ ռազմագերիներին անօրինաբար պահելու եւ խոշտանգելու, դաժանօրէն կեանքից զրկելու, զոհուածների մարմինները խեղելու եւ պղծելու, Արցախի մեր ժողովրդի ազատ ու անկախ կեանքի իրաւունքը ոտնահարելու, հայկական պատմամշակութային եւ հոգեւոր ժառանգութիւնը ոչնչացնելու եւ իւրացնելու փաստերի առնչութեամբ, որոնք յստակ եւ հիմնաւոր փաստագրուած են նաեւ միջազգային հանրութեան եւ կառոյցների կողմից: 

Թուարկուած հարցերը կարօտ են շուտափոյթ լուծումների, իսկ մարդասիրական խնդիրները առաւել եւս կարիքն ունեն Ադրբեջանի հոգեւոր առաջնորդի ուշադրութեան եւ միջնորդական ջանքերի: Սուրբ Էջմիածնի կոչն է Կովկասի մահմեդականների վարչութեան նախագահ Շէյխ-ուլ-իսլամ Ալլահշուքիւր Փաշազադէին` հաւատարիմ հոգեւոր իր կոչմանն ու առաքելութեանը, տեսանելի քայլեր գործադրել այս ուղղութեամբ` թօթափելու վշտացեալ հոգիներից ցաւն ու տրտմութիւնը: 

Թող Բարձրեալը օրհնի տարածաշրջանի ժողովուրդների կեանքը երկնապարգեւ խաղաղութեամբ, ողորմութեամբ եւ առատ շնորհներով»: