Արցախի Հանրապետութեան նախագահ Արայիկ Յարութիւնեանի գլխաւորած պատուիրակութիւնը Դեկտեմբեր 6-ին հանդիպում ունեցած է Ֆրանսայի Ծերակոյտի եւ Ազգային ժողովի խորհրդարանական խմբակցութիւններու ղեկավարներուն եւ պատասխանատուներուն հետ։

Հանդիպումին քննարկուած են Արցախեան հակամարտութեան լուծման, Արցախ-Ֆրանսա կապերու եւ տարածաշրջանային գործընթացներուն վերաբերող հարցեր:

Խօսելով Ֆրանսայի, մասնաւորապէս օրէնսդիր մարմինին հետ յարաբերութիւններու զարգացման հոլովոյթին մէջ Արցախի շահագրգռութեան մասին՝ նախագահը բարձր գնահատած է Ծերակոյտի և Ազգային ժողովի հետեւողական ջանքերը՝ ուղղուած ղարաբաղեան հակամարտութեան կարգաւորման գործընթացին: 

“Ֆրանսայի Ծերակոյտին եւ Ազգային ժողովին կողմէ Արցախի վերաբերեալ ընդունուած բանաձեւերը դրական հիմք կը հանդիսանան Արցախի եւ Ազերպայճանի միջեւ հակամարտութեան հաստատուն եւ համապարփակ լուծման համար։ Արցախի ժողովուրդի ինքնորոշման իրաւունքի յարգումը եւ ճանաչումը հակամարտութեան լուծման միակ ճանապարհն է, որ կ՚երաշխաւորէ Արցախի ժողովուրդի իրաւունքներու եւ անվտանգութեան ապահովումը”,– ընդգծած է Արայիկ Յարութիւնեան։

Շնորհակալութիւն յայտնելով  խորհրդարանականներուն՝ բանաձեւերու ընդունման համար՝ նախագահը նշած է, որ այդ որոշումները քաղաքական ուղերձ են եւ լիովին կը համապատասխանեն Ֆրանսայի աւանդութիւններուն հիմնուած՝ ազատութեան, հաւասարութեան եւ եղբայրութեան սկզբունքներուն վրայ։

Արցախի նախագահը շեշտած է, թէ այսօր աւելի կարեւոր խնդիր է այս քաղաքական ուղերձները իրականութիւն դարձնելը, անոնց իրաւական ուժ տալը։ Այդ համածիրին մէջ Յարութիւնեան յոյս յայտնած է, որ Արցախի Հանրապետութեան ճանաչման ուղղութեամբ աշխատանքները իրենց աւարտին կը հասցնէ Ֆրանսայի գործադիր իշխանութիւնը՝ կանխելով Արցախահայութեան նոր ցեղասպանութիւնը իր իսկ հայրենիքին մէջ: 

Ներկայացնելով Արցախի մէջ տիրող իրավիճակը, Յարութիւնեան անդրադարձած է Արցախը Հայաստանին կապող մայրուղիի միջադէպին. “Արցախը կապուած է Հայաստանի եւ արտաքին աշխարհի հետ միայն մէկ ճանապարհով՝ 5 քիլոմեթր լայնք ունեցող Լաչինի միջանցքով: Ազերպայճան կ՚ուզէ կտրել այդ միակ եւ վերջին կապը արտաքին աշխարհի հետ՝ խեղդամահ ընելով Արցախը: Մենք կը փափաքինք, որ Լաչինի միջանցքը ունենայ լրացուցիչ միջազգային երաշխիքներ՝ Հայաստանի եւ արտաքին աշխարհի հետ Արցախի կապը անխափան ապահովելու համար”: 

Արցախը, ըստ երկրի ղեկավարին, կ՚ակնկալէ Ֆրանսայի ներգրաւումը նա՛եւ մարդասիրական ծրագրերու, գերեվարուած Հայերու վերադարձը ապահովելու եւ Ազերպայճանի բռնագրաւած տարածքներուն մէջ վտանգի տակ գտնուող հայկական հոգեւոր-մշակութային ժառանգութիւնը փրկելու գործընթացին: 

Հանդիպում՝ Ֆրանսա-Արցախ բարեկամութեան շրջանակի նախագահ Ֆրանսուա Փիւփոնիի հետ

Նոյն օրը, Ֆրանսա–Արցախ բարեկամութեան շրջանակի նախագահ Ֆրանսուա Փիւփոնի հանդիպում ունեցած է Արայիկ Յարութիւնեանի գլխաւորած պատուիրակութեան հետ։

Արցախի նախագահը շնորհակալութիւն յայտնելով Բարեկամութեան շրջանակի անդամներուն՝ Արցախցիներու կողքին ըլլալնուն եւ անոնց արդար դատը պաշտպանելնուն համար, յատկապէս ընդգծած է. “Մենք խորապես երախտապարտ ենք եղբայր Ֆրանսային, քաղաքական եւ հասարակական գործիչներուն, բոլոր անոնց, որոնք Արցախի կողքին են եւ կը պաշտպանեն մեր արդար պայքարը յանուն անկախութեան եւ ազատութեան։ Սա ողջունելի վերաբերում է եւ խիզախ դիրքորոշում”։

Իր կարգին, Փիւփոնի ալ յատկապէս նշած է.- “Մեր պարտականութիւնն է պաշտպանել Արցախի ժողովրդն ու երաշխաւորել Հարաւային Կովկասի մէջ նոր ծնունդ առնող ժողովրդավարութիւնը, որ բանալին կը հանդիսանայ տարածաշրջանին մէջ կայուն խաղաղութեան հաստատման”:

Այս հանդիպումէն ետք, Փիւփոնիի կողմէ՝ ի պատիւ Արայիկ Յարութիւնեանի կազմակերպուած է ընթրիք մը, որուն ներկայ եղած են նաեւ ծերակուտականներ, երեսփոխաններ, եւ CCAF-ի համանախագահները։