Ֆրանսա գտնուող Արցախի Հանրապետութեան նախագահ Արայիկ Յարութիւնեանի գլխաւորած պատուիրակութիւնը Դեկտեմբեր 7-ին հանդիպում ունեցաւ Փարիզի քաղաքապետուհի Անն Հիտալկոյի հետ: Կողմերը քննարկեցին Արցախ-Ֆրանսա կապերու զարգացման, արցախեան հակամարտութեան լուծման վերաբերող շարք մը հարցեր:
Արցախի նախագահը բարձր գնահատեց Անն Հիտալկոյի ջանքերը՝ ուղղուած Արցախի ժողովուրդի իրաւունքներու պաշտպանութեան, անկախութեան միջազգային ճանաչման համար պայքարին սատարելուն, ինչպէս նաեւ Ազերպայճանի կողմէ բռնագրաւուած տարածքներուն մէջ Արցախի հոգեւոր-մշակութային ժառանգութեան պաշտպանութեան: Նախագահը նաեւ շնորհակալութիւն յայտնեց Փարիզի քաղաքային խորհուրդի անդամներուն՝ Արցախի Հանրապետութեան անկախութեան ճանաչման բանաձեւին ի նպաստ քուէարկութեան համար:
Նախագահը ընդգծեց, որ միջազգային յարաբերութիւններու զարգացումը Արցախի առաջնահերթ խնդիրներէն մէկն է: Այդ համածիրին մէջ Յարութիւնեան կարեւոր սեպեց Ֆրանսայի վարչական շրջաններու եւ քաղաքներու հետ Արցախի՝ ապակեդրոնացուած համագործակցութեան ընդլայնումն ու խորացումը, յոյս յայտնելով, որ երկկողմ յարաբերութիւնները աշխուժ կերպով պիտի զարգանան:
Փարիզի քաղաքապետուհին ալ իր կարգին վստահեցուց, որ Փարիզ միշտ պիտի ըլլայ Արցախի եւ անոր ժողովուրդի կողքին՝ պաշտպանելով Արցախցիներու ինքնորոշման եւ խաղաղ ապրելու իրաւունքները:
