«Սիրելի՛ հայրենակիցներ,
2023 թուականը դիմաւորում ենք արտակարգ պայմաններում: Անցնող տարուայ ընթացքում Արցախի Հանրապետութեան խաղաղ բնակչութեան հանդէպ իրականացուած բազմաթիւ յարձակումներից եւ գրգռութիւններից բացի, Ադրբեջանը Դեկտեմբերի 12-ին նաեւ փակեց Արցախը Մայր Հայաստանին կապող միակ ճանապարհը՝ մեզ կանգնեցնելով նոր մարտահրաւէրների առջեւ: Տարաբնոյթ դժուարութիւններն ու փորձութիւնները յաղթահարելու ճանապարհին մեր ժողովուրդը դարձաւ աւելի ուժեղ ու ամրակուռ՝ մէկ անգամ եւս վերահաստատելով սեփական հողի վրայ ազատ ու անկախ ապրելու, արարելու կամքն ու վճռականութիւնը: Մեր ժողովուրդը նման զրկանքների պակաս չի ունեցել դարերի եւ յատկապէս վերջին տասնամեակների ընթացքում, սակայն կարողացել է վճռական ու միասնական պայքարի միջոցով յաղթահարել մարտահրաւէրները: Ուստի, վստահ եմ, որ այս ծանրագոյն ճգնաժամն էլ ենք անցնելու պատուով:
Թանկագի՛ն բարեկամներ,
Այս տօնական օրին ուզում եմ շնորհակալութիւն յայտնել ձեզ՝ միմեանց սատարելու եւ առկայ մարտահրաւէրները արժանապատիւ կերպով դիմագրաւելու համար: Ամանորի այս գիշերը մեր շատ ընտանիքներ կիսուած են: Ուզում եմ ներողութիւն խնդրել յատկապէս այն երեխաներից, ովքեր հեռու են գտնւում ծնողներից՝ Արցախի կեանքի ճանապարհը բացելու նպատակով մեր կողմից գործադրուած ջանքերի դեռեւս անարդիւնաւէտ լինելու համար: Ուզում եմ յիշենք եւ խոնարհուենք մեր Հայրենիքի նուիրեալների յիշատակին։ Այդ յիշատակը կարող ենք վառ պահել միայն հայկական Արցախով, Արցախում ապրելով եւ պայքարելով: Համոզուած եղէք, որ, հայրենիքի այս գողտրիկ անկիւնում ապրելով ու ծառացող դժուարութիւնները հերոսաբար յաղթահարելով, մեզանից իւրաքանչիւրը իւրովի կարեւոր առաքելութիւն է կատարում՝ յանուն հայ ժողովրդի լինելութեան եւ նրա ապագայի: Ուզում եմ նաեւ խորին երախտագիտութիւն յայտնել մեր քոյրերին ու եղբայրներին Մայր Հայաստանում եւ Սփիւռքում, բոլոր նրանց, ովքեր մեզ հետ են, մեր կողքին, իրենց աջակցութիւնն ու զօրակցութիւնն են ցուցաբերում Արցախին այս դժուարին օրերին:
Խաղաղութիւն, բարօրութիւն, վճռականութիւն, յոյս ու հաւատ բոլորիս:
Շնորհաւոր Ամանոր եւ Սուրբ Ծնունդ»:
