Արցախի նախագահի խորհրդական Դաւիթ Բաբայեան անդրադառնալով Պրիւսէլի մէջ տեղի ունեցած եռակողմ հանդիպումին հետեւած Եւրոպական խորհուրդի (ԵԽ) նախագահ Շառլ Միշէլի յայտարարութեան, յայտնած է, թէ Արցախի մէջ զզուանքի ու գարշանքի տրամադրութիւն կը տիրէ։
“Գիտենք՝ ո՛վ է Միշէլը։ Ընդհանրապէս նման մարդկանց առկայութիւնը ժողովրդավարական համակարգում խայտառակութիւն է։ Ուրիշ ո՛չ մի ձեւ ես այն չեմ կարողանում բնութագրել: Շառլ Միշէլը հաւասարուեց Չեմբեռլենի հետ՝ 1938 թուականի այդ խայտառակ միւնխենեան դաւադրութեան ցայտուն ներկայացուցիչներից մէկին: Շառլ Միշէլը Եւրոպան հաւասարեցրեց 1938 թուականի Եւրոպային եւ նացիստական Գերմանիային: Քանի որ սրանով փաստօրէն արդարացուեց Ադրբեջանի 2020 թուականի յարձակումը, արդարացուեց այսպէս կոչուած ադրբեջանցի «բնապահ»-ների կողմից հսկիչ կէտի տեղադրումն ու քայլերը՝ ուղղուած հայ ժողովրդի ու Արցախի դէմ: Աւելի՛ն՝ Եւրոպան յանցակից դարձաւ Ադրբեջանին”,– ըսած է ան։
Հակառակ այս բոլորին, Դաւիթ Բաբայեան նշած է, որ պէտք է յստակ աշխատանք տարուի։
“Պէտք է նաև շնորհակալութիւն յայտնենք նոյն Միշէլին՝ ճշմարտութիւնը բացայայտելու համար: Մնացել է մի քանի ստորակէտ դրուի եւ ամէն ինչ պարզ կը լինի: Ստորակէտներից մէկը ԱՄՆ-ն է, որպէսզի չասենք հաւաքական Արեւմուտքն է թքում ժողովրդավարութեան վրայ եւ նացիստական Գերմանիային եւ Չեմբեռլենին արդարացնում նորագոյն պատմութեան ընթացքին, պէտք է նաեւ Ուաշինկթընի կարծիքն իմանանք: Շատ կարեւոր է, թէ Հայաստանն ի՞նչ է մտածում, ոչ թէ Միշէլը պէտք է ասի, որ ճանաչել է, այլ Հայաստանը պէտք է պաշտօնապէս յայտարարի, թէ արդեօք ճանաչե՞լ է Ադրբեջանը 86.600 քառակուսի կմ. տարածքով: Իշխանութիւնը եւ ժողովուրդը պէտք է յստակ իրենց դիրքորոշումն արտայայտեն: Միգուցէ իշխանութիւնն ու ժողովուրդն ուզում են, որ Արցախը կործանուի: Ես չգիտեմ: Փաստերով պէտք է խօսել, ոչ թէ զգացմունքներով: Եթէ այդպէս էք մտածում, մենք պէտք է իմանանք, որ որբ ենք: Յստակ պատասխաններ պէտք է ստանայ Արցախի ժողովուրդը Հայաստանից եւ սեփական իշխանութիւնից: Այս պահին վերլուծում ենք, մտածում ենք եւ սպասում պատասխանների: Ժողովուրդը չպէտք է դառնայ ոչխար, քանի որ ոչխարի վերջը խորովածն է: Կա՛մ պէտք է պայքարենք, կա՛մ պէտք է ազգովին դուրս գանք գնանք, կա՛մ էլ պէտք է լինենք Ադրբեջանի կազմում: Վերջինը բացառուած է: Պէտք է ազգովին կողմնորոշուենք: Սա հայ ժողովրդի ինքնորոշման պահն է”,– եզրափակած է քաղաքական գործիչը։
