Արցախի Արտաքին գործոց նախարարութեան արձագանգը՝ Շառլ Միշէլի յայտարարութեան

Արցախի Արտաքին գործոց նախարարութիւնը արձագանգելով՝ Մայիս 14-ին տեղի ունեցած եռակողմ հանդիպումէն ետք Եւրոպայի խորհուրդի նախագահ Շառլ Միշէլի յայտարարութեան, հրապարակած է հաղորդագրութիւն մը նշելով, որ թէ՛ յայտարարութեան ընդհանուր բովանդակութիւնը, թէ՛ ալ անոր առանձին դրոյթները կը վկայեն, որ Եւրոպական Միութեան ղեկավարութիւնը կը շարունակէ անտեսել Արցախի ժողովուրդի օրինական իրաւունքներն ու շահերը, առաջնորդուելով մի՛այն տարածաշրջանին մէջ ունեցած սեփական աշխարհաքաղաքական և ժամանակաւոր շահերով՝ ի վնաս Եւրոպական Միութեան կողմէ հռչակուած ժողովրդավարութեան եւ մարդկային իրաւանց արժէքներուն։

Հաղորդագրութեան մէջ յատկապէս նշուած է․

« (…) Շառլ Միշէլի յայտարարութեան մէջ բացակայում է որեւէ յիշատակում Բերձորի միջանցքի արդէն աւելի քան 5 ամիս շարունակուող փակման, միջանցքի մուտքի մօտ ադրբեջանական ապօրինի անցակէտի տեղադրման եւ Արցախի 120 հազար բնակչութեան պաշարման մասին՝ դրանից բխող բոլոր մարդասիրական հետեւանքներով։ Այս փաստը ցոյց է տալիս, որ Եւրոպական խորհրդի նախագահը ո՛չ միայն չի խոչընդոտում, այլեւ փաստօրէն խրախուսում է Ադրբեջանին Արցախի ժողովրդի տառապանքները օգտագործել որպէս քաղաքական գործիք։

Սակայն, եթէ Արցախում մարդասիրական աղէտ հրահրելու եւ ցեղային զտումներ իրականացնելու Ադրբեջանի մտադրութիւններն ու տեսանելի գործողութիւնները չեն մտահոգում Եւրոպական խորհրդի նախագահին, ապա մենք իրաւունք ունէինք ակնկալելու, որ նրա ներկայացրած կազմակերպութիւնն անմիջական շահագրգռութիւն կը ցուցաբերի Ադրբեջանի կողմից ժամանակակից միջազգային իրաւակարգի հիմնասիւներից մէկը հանդիսացող Մարդու իրաւունքների եւրոպական դատարանի եւ ՄԱԿ-ի միջազգային ատեանի որոշումների անշեղ իրականացման նկատմամբ։ Այս առումով տարակուսանք է առաջացնում, որ Եւրոպական խորհրդի նախագահը  փաստօրէն անտեսում է Ադրբեջանի կողմից ՄԱԿ-ի բարձրագոյն դատական մարմնի իրաւաբանօրէն պարտադիր վճիռի հետեւողական արհամարհումը, ինչպէս նաեւ միջազգային իրաւունքի չափանիշերի, յատկապէս, ուժի կամ ուժի սպառնալիքի չկիրառման եւ վէճերի խաղաղ կարգաւորման սկզբունքների համակարգուած  խախտումները։

(…)

Կրկին յիշեցնում ենք, որ 1991-ին Արցախի ժողովուրդը, միջազգային իրաւունքի չափանիշերին եւ այն ժամանակ գործող ներպետական օրէնսդրութեան լիովին համապատասխան, իրացրել է ինքնորոշման իր անքակտելի իրաւունքը եւ ստեղծել իր պետականութիւնը նոյն հիմքերի վրայ, ինչ Ադրբեջանը եւ Հայաստանը: Արցախի իշխանութիւնները  հետեւողականօրէն պաշտպանել եւ շարունակելու են պաշտպանել իրենց ժողովրդի օրինական ընտրութիւնն ու ազատ կամքի արտայայտութիւնը։

Առանձին երկրների եւ միջազգային կազմակերպութիւնների ոեւէ ներկայացուցիչ իրաւունք չունի տնօրինել Արցախի ժողովրդի ճակատագիրը։

Աւելի՛ն, ուժի ապօրինի կիրառման եւ շարունակուող ահաօրինականացման վրայ հիմնուած օրակարգը Արցախի ժողովրդին պարտադրելու որեւէ փորձ հաւասարազօր է մեղսակցութեան Արցախի ցեղային զտմանն ու տարածաշրջանում լարուածութեան մշտական օջախի պահպանմանն ուղղուած Ադրբեջանի յանցաւոր ծրագրերի իրականացմանը, ինչպէս նաեւ՝ վերջինիս տարածքային նկրտումների ու յարձակողական քաղաքականութեան խրախուսման։   

Այս կապակցութեամբ կրկին վերահաստատում ենք Արցախի Հանրապետութեան ժողովրդի եւ իշխանութիւնների վճռականութիւնը՝ շարունակել պայքարն իրենց անքակտելի իրաւունքների համար՝ միջազգային իրաւունքի սկզբունքներին համապատասխան։ Համոզուած ենք, որ մի՛այն Արցախի ժողովրդի կողմից իրացուած ինքնորոշման իրաւունքի ճանաչումը կարող է հիմք հանդիսանալ հակամարտութեան կայուն կարգաւորման եւ տարածաշրջանում երկարաժամկէտ ու արդար խաղաղութեան եւ կայունութեան հաստատման համար։

Միաժամանակ, յիշեցնում ենք, որ Արցախի Հանրապետութեան իշխանութիւնները միշտ էլ հանդէս են եկել բանակցութիւնների միջոցով ադրբեջանա-ղարաբաղեան հակամարտութեան համապարփակ կարգաւորման օգտին։ Արցախի Հանրապետութիւնը շարունակում է բաց մնալ հակամարտութեան բոլոր բաղադրիչների եւ խաղաղ կարգաւորմանն ուղղուած ողջամիտ առաջարկների քննարկման համար՝ համաձայնեցուած եւ միջազգայնօրէն ճանաչուած բանակցային ձեւաչափով, կողմերի իրաւահաւասարութեան հիման վրայ եւ նրանց ստանձնած պարտաւորութիւնների իրականացման միջազգային ամուր երաշխիքների առկայութեան պայմաններում»։