«Լոյս չկայ, խանութները դատարկ են»
Յունիս 27-ի իրիկունը, Երեւանի մէջ Ֆրանսայի դեսպանատան առջեւ նստացոյցի մասնակիցները ուղղակի կապ հաստատած են Արցախի Ազգային ժողովի «Արդարութիւն» խմբակցութեան քարտուղար Մետաքսէ Յակոբեանի հետ։ Վերջինս ներկայացուցած է Արցախի մէջ տիրող կացութիւնը։
Ստորեւ՝ փոքրիկ հատուած մը.
«Դուք ականատես էք, որ ես մթութեան մէջ եմ, այսինքն՝ յաջորդական անջատումներն են: Արցախում արդէն տեւական ժամանակ օրը 3 անգամ 2-ական ժամով դեռեւս անջատումներ են լինում: Այսօր ես քայլելով քանի քիլոմեթր եմ անցել, որովհետեւ այլեւս հնարաւորութիւն չունենք տեղաշարժուելու կառքերով, հանրային երթեւեկութեան միջոցներն էլ բաւականին ծանրաբեռնուած են: Այս ընթացքում յատուկ մտել եմ խանութներ եւ տեսել եմ այն իրավիճակը, որն այսօր կայ: Առաջին անհրաժեշտութեան ապրանքներ խանութներում գրեթէ չկան։ Կան բաներ, որոնք առօրեայ օգտագործման համար չեն եւ դեռեւս հնուց են մնացել: Բանջարեղէնի եւ միրգի մասին այլեւս չենք խօսում, նոյնիսկ տեղական արտադրածը շատ քիչ քանակութեամբ է լինում եւ աստղաբաշխական գիներով, շատ արագ էլ սպառւում է: Այսինքն՝ 21-րդ դարում այսօր Արցախում 30 հազար երեխայ ուղղակի զրկուած է կենսանիւթերով սնունդ ընդունելու հնարաւորութիւնից: Ժողովրդի մէջ մի պահ խուճապ էր առաջացել ցորենի պաշարների հետ կապուած: Մարդիկ փորձում են սնունդը պահեստաւորել: Անհանգստութիւնը ոչ թէ մեծ է, թէ ինչու չի բացւում ճանապահը, այլ՝ վարուող քաղաքականութիւնից եւ միջազգային հանրութեան վերաբերմունքից»:
