Հայաստանի մարդկային իրաւանց պաշտպան Անահիտ Մանասեանի յայտարարութիւնը Բերձորի միջանցքի փակման հետեւանքով Արցախի բնակչութեան հիմնական  իրաւունքներու խախտման վերաբերեալ. 

Մարդկային իրաւանց պաշտպանը կ՚արձանագրէ, որ արդէն 7 ամիսէ աւելի է Արցախի հայ բնակչութիւնը կը գտնուի շրջափակման մէջ, որու հետեւանքով մարդասիրական աղէտը օրէ-օր աւելի կը խորանայ՝ անուղղակիօրէն յանգեցնելով անդառնալի հետեւանքներու, ներառեալ՝ մարդկային կորուստներու: 

Մասնաւորապէս, Արցախը Հայաստանին եւ ամբողջ աշխարհին կապող միակ ճանապարհին՝ Բերձորի միջանցքի փակման հետեւանքով շարունակաբար կը  խախտուին մարդոց, յատկապէս՝ խոցելի խումբերու ներկայացուցիչներու մարդասիրական իրաւունքներն ու ազատութիւնները, ինչպէս՝ կեանքի, անվտանգութեան, ազատ տեղաշարժի, սնունդի, հոգեկան եւ ֆիզիքական առողջութեան պահպանման, բաւարար կենսամակարդակի, կրթութեան իրաւունքները, բայց նաեւ բնակիչներու արժանապատւութիւնը՝ որպէս մարդկային իրաւանց եւ ազատութիւններու անքակտելի հիմք։ 

Յունիս 22-ին ազերպայճանական իշխանութիւնները կրախիճէ արգելապատնէշներով բացարձակապէս խափաներ էին ռուս խաղաղապահներու եւ Կարմիր խաչի միջազգային կոմիտէի կողմէ մարդասիրական օգնութեան մատակարարումը՝ սրելով Արցախի մէջ մարդասիրական իրավիճակը (մարդասիրական օգնութեան տրամադրումը խափանուած է Յունիս 15-էն ի վեր)։ Հակառակ անոր, որ ներկայիս կրախիճէ պատնէշը վերցուած է,  սակայն մարդասիրական օգնութեան (առաջին անհրաժեշտութեան պարագաներու եւ պարէնային ապրանքներու) մատակարարումը կը շարունակէ խափանուած մնալ Ազերպայճանի իշխանութիւններուն կողմէ։ Առաջին անհրաժեշտութեան իրերու եւ սնունդի բացակայութիւնը մարդիկ կը յանգեցնէ թերսնման, ինչ որ էականօրէն կ՚ազդէ բնակչութեան առողջական վիճակին վրայ: Աւելին, ազերպայճանական կողմը շարունակաբար կը խոչընդոտէ Կարմիր խաչի միջազգային կոմիտէին՝ Արցախէն Հայաստան բուժառուներ փոխադրելը, ներառեալ՝ պարբերաբար արգիլելով։ 

Մարդկային իրաւանց պաշտպանի աշխատակազմին կողմէ հաւաքագրուած փաստերը եւ վերլուծութիւնները կը վկայեն, որ ազերպայճանական իշխանութիւններու նման գործելաոճը՝ ուղղուած Արցախի բնակչութեան հիմնական իրաւունքներու ոտնահարման, զուգորդուած՝ պետութեան կողմէ հովանաւորուող հայատեացութեան քաղաքականութեամբ, մէկ հիմնական վերջնանպատակ կը հետապնդէ՝ մարդասիրական ճգնաժամի խորացման միջոցով հայաթափել Արցախը։ 

Պաշտպանը անգամ մը եւս կոչ կ՚ընէ միջազգային կազմակերպութիւններուն եւ դերակատարներուն գործուն ջանքեր գործադրելու՝ կանխելու վերահաս ցեղային զտումը։ 

Միեւնոյն ատեն, Պաշտպանի աշխատակազմը իր լիազօրութեան շրջանակին մէջ կը շարունակէ ամէնօրեայ դրութեամբ տեղեկատւութիւն ու փաստեր հաւաքագրել եւ տրամադրել միջազգային կազմակերպութիւններուն` Արցախի մէջ ազերպայճանական իշխանութիւններու հայատեաց քաղաքականութեան հետեւանքով մարդկային իրաւանց շարունակական կոպիտ խախտումներու եւ մարդասիրական ճգնաժամի ահագնացող հետեւանքներուն վերաբերեալ։ 

ՀՀ ՄԻՊ ԱՇԽԱՏԱԿԱԶՄ 

Յուլիս 22