Վիրահայոց թեմի «Յովհ. Թումանեանի տուն» գիտամշակութային կեդրոնի աշխատակիցներուն համար անակնկալ չէր ծանօթ գեղանկարիչ, ծնունդով թիֆլիսցի Անդրեյ Շուգարովի այցը՝ Թիֆլիս, քանզի «Վրաստան» թերթէն արդէն տեղեկացած էին նկարիչին՝ թիֆլիսահայութեան այցելութեան մասին:

Արդարեւ, Հոկտեմբեր 12-ին, Վիրահայոց թեմի առաջնորդ Կիրակոս եպիսկոպոս Դաւթեանի առաջնորդութեամբ, Կեդրոն այցելած է Երեւանէն ժամանած արուեստասէրներու խումբը, որուն մաս կը կազմէին Շուգարով, «Վրաստան» թերթի խմբագիր Վան Բայբուրթեան եւ ուրիշներ:

Այցելելով  Թումանեանի թիֆլիսեան նախկին բնակարանը, Շուգարով կեդրոնին նուիրած է Թումանեանի դիմանկարով իր կտաւը՝ նշելով, թէ այսուհետեւ Ժողովրդական մեծ բանաստեղծը սոյն կեդրոնի այցելուները  «պիտի ողջունէ» այդ դիմանկարէն:

Սրբազան հայրը անուանի մեծ վարպետը պարգեւատրած է «Յովհաննէս Թումանեան» յուշամետալով: