Նիկոլ Փաշինեան Մարտ 14-ին հեռաձայնային զրոյց ունեցած է Ռուսաստանի նախագահ Վլատիմիր Փութինի հետ։

Զրոյցի ընթացքին վարչապետը իր խօսակիցը տեղեակ պահած է «Հայաստանի եւ Ազերպայճանի միջեւ խաղաղութեան եւ միջպետական յարաբերութիւններու հաստատման համաձայնագրի» նախագծին շուրջ բանակցութիւններու աւարտին մասին։

Քրեմլինի հրապարակած հաղորդագրութեան համաձայն՝  զրոյցին նախագահ Փութին ալ յայտնած է, թէ «Ռուսաստան միշտ աջակցած է եւ պիտի շարունակէ աջակցիլ հայ-ազերպայճանական յարաբերութիւններու կարգաւորման՝ ի շահ Անդրկովկասեան տարածաշրջանին մէջ ապահովութեան, կայունութեան եւ կայուն ընկերա-տնտեսական զարգացման, թէ՝ այս նպատակներուն հասնելու համար թէ՛ Հայաստան, թէ՛ Ազերպայճան միշտ կրնան վստահիլ Ռուսաստանի օգնութեան»:

Միւս կողմէ, Հայաստանի վարչապետը հաստատած է, թէ ընդունած է Ռուսաստանի նախագահին հրաւէրը եւ պիտի մասնակցի Մայիս 9-ին Մոսկուայի մէջ կայանալիք յոբելինական ձեռնարկներուն՝ նուիրուած Հայրենական մեծ պատերազմի յաղթանակի 80-ամեակին։

Նշենք, թէ հեռաձայնային զրոյցը տեղի ունեցած է հայկական կողմի նախաձեռնութեամբ։

Աւելցնենք, թէ վարչապետ Նիկոլ Փաշինեան Իրանի նախագահ Մասուտ Փեզեշքեանի հետ եւս հեռաձայնային զրոյց ունեցած է՝ վերջինս տեղեակ պահելով Հայաստան-Ազերպայճան համաձայնագրին շուրջ բանակցութիւններու աւարտին մասին։