Մարտ 26-ին, Հալէպի մէջ Հայաստանի հիւպատոսութիւն այցելած է Թուրքիոյ հիւպատոս Մուամմեր Հաքան Ճենկիզ՝ ընկերակցութեամբ փոխհիւպատոս Էրինի:

Ողջունելով հիւրերը, աւագ հիւպատոս Արա Աւետիսեան շնորհաւորած է՝ երկար դադարէ ետք Թուրքիոյ հիւպատոսութեան վերաբացումը եւ Ռամազանը։ Ան նաեւ շեշտած է, թէ Հայաստանի հիւպատոսութիւնը Հալէպի մէջ գործած է անընդմէջ աւելի քան 30 տարի, նոյնիսկ պատերազմի եւ պաշարման ժամանակաշրջանին:

Աւետիսեան շնորհակալութիւն յայտնած է Թուրքիոյ կառավարութեան՝ Հայաստանէն Սուրիա մարդասիրական օգնութեան փոխադրութեան աջակցելուն համար։ Ան յաջողութիւն մաղթած է Թուրքիոյ հիւպատոսին։

Շնորհակալութիւն յայտնելով ընդունելութեան համար Մ. Ճենկիզ իր կարգին նշած է, թէ դիւանագիտական բարոյագիտութիւնը յարգելով՝ այցելած է Հալէպի միակ դիւանագիտական ներկայացուցչութիւնը՝ իր հայ գործընկերոջ հետ ծանօթանալու նպատակով:

Ան Հայաստանի հիւպատոսը հրաւիրած է Թուրքիոյ հիւպատոսութեան բացման արարողութեան։ Հրաւէրը ընդունուած է։

Կողմերու միջեւ համաձայնութիւն գոյացած է շարունակելու գործակցութիւնը։