Մայիս 9-էն Նոյեմբեր 23 տեղի կ՚ունենայ Վենետիկի երկամեայի 19-րդ միջազգային ճարտարապետական ցուցահանդէսը։ Հայաստան կը մասնակցի հայեցակարգային առումով հմայիչ եւ արհեստագիտական առումով ալ առաջատար ծրագրով մը, որ կը կրէ «Մանրաճարտարապետութիւն արհեստական բանականութեան միջոցով. նոր յիշողութիւններ ստեղծել հին յուշարձաններով» վերնագիրը։

Հայկական տաղաւարին մէջ կը ներկայացուի մեր երկրի հարուստ ճարտարապետական ժառանգութեան վրայ նորարար հայեացք մը՝ օգտագործելով արհեստական բանականութեան (ԱԲ) հզօրութիւնը նոր պատումներ բացայայտելու եւ պատմական յիշողութեան հետ նոր կապեր ստեղծելու համար:

Կարելի է պատկերացնել, որ ԱԲ-ն կը գործածուի վերլուծելու համար հայկական յուշարձաններու վերաբերող մեծաքանակ տուեալներ, կառուցման եղանակներէն մինչեւ զարդարանքներ, բացայայտելով տարածական, ոճական կամ խորհրդանշական յարաբերութիւններ, որոնք կրնան վրիպիլ աւանդական վերլուծութենէն:

Բացի ատկէ, «նոր յիշողութիւններու» գաղափարը կրնայ թելադրել խորհրդածութիւն՝ պատմութեան մեր ընկալման եւ անոր հետ մեր յարաբերութեան վրայ թուային արհեստագիտութեան ազդեցութեան մասին: ԱԲ-ն կրնայ ոչ միայն վերլուծել անցեալը, այլ նաեւ ստեղծել նոր պատումներ եւ մեկնաբանութիւններ, բանալով աննախադէպ երկխօսութիւններ ներկայի եւ ժամանակի մնացորդներու միջեւ:

Այս կապակցութեամբ Թումօ կեդրոնին մէջ հրաւիրուած մամլոյ ասուլիսին տեղեկութիւններ հաղորդած են Կրթութեան, գիտութեան, մշակոյթի ու մարզանքի փոխնախարար Դանիէլ Դանիէլեան, Հայաստանի տաղաւարը համադրող Մարիաննա Կարապետեան, Թումոյի գործադիր տնօրէնուհի Մարի Լու Փափազեան եւ սոյն առիթով կազմուած ստեղծագործական խումբի անդամները։

Դանիէլ Դանիէլեան վստահութիւն յայտնած է, որ Թումոյի գլխաւորութեամբ կազմուած խումբը հիանալի կերպով պիտի ներկայացնէ Հայաստանը եւ մեր երկրի ճարտարապետական արժէքները:

Ներկայացուելիք նիւթերու պատրաստութեան մէջ մեծ ներդրում ունեցած են Սիփանա Չագրեան եւ Շահան Վիտալ-Կորէն։

Հայաստանի տաղաւարի պաշտօնական բացումը տեղի կ՚ունենայ Մայիս 9-ին։