Փետրուար 3-ին, լրագրողներու հետ տեղի ունեցած ասուլիսին, ՀՀ Արտաքին գործոց նախարար Արարատ Միրզոյեան յայտարարած է.–
”Պաքուն բացասաբար է արձագանգել սահմանազատման և սահմանագծման հարցով Հայաստանի առաջարկներին։ Տարբեր առաջարկներ են ներկայացուել, որոնց բացասական արձագանգ է եղել։ Սա հետեւողական գործընթաց է, և եղել են առաջարկներ, որոնք անընդունելի են եղել Հայաստանի համար։ Մենք բազմիցս յայտարարել ենք, որ շահագրգռուած ենք Ադրբեջանի հետ սահմանի սահմանազատման գործընթացով”։
Ան ըսած է, թէ Հայաստան հաւատարիմ կը մնայ անվտանգութեան, կայունութեան գործիքակազմեր ստեղծելու մասին կատարուած յայտարարութեան։
“Հայաստանի վարչապետը, Ադրբեջանի նախագահը և Ռուսաստանի նախագահը Սոչիում պայմանաւորուել են, որ կողմերը քայլեր կը ձեռնարկեն տարածաշրջանում անվտանգութեան եւ կայունութեան մակարդակի բարձրացման ուղղութեամբ։ Մենք հարիւր տոկոսով հաւատարիմ ենք այս յայտարարութեան եւ մեր ստանձնած պարտաւորութիւններին: Այժմ ադրբեջանական եւ ռուսական կողմերի հետ քննարկում ենք անվտանգութեան այն միջոցառումները, որոնք, մեր կարծիքով, անվտանգութեան եւ կայունութեան մեխանիզմներ կը ստեղծեն սահմանային գօտում”,– շեշտած է ԱԳ նախարարը։
* * *
Պայրամով յայտարարած է, թէ «Հայաստան իրաւունք չունի սահմանազատման գծով որևէ պայման դնելու»
Ըստ ազէրպայճանական լրասփիւռներու՝ Ազէրպայճանի Արտաքին գործոց նախարար Ճէյհուն Պայրամով Փետրուար 3-ին յայտարարած է, թէ «Հայկական կողմը որոշ պայմաններ դրած է՝ Ազէրպայճանի և Հայաստանի միջև սահմանազատման և սահմանագծման յանձնաժողովի աշխատանքները սկսելու համար: Ազէրպայճան կրնայ սկսիլ այդ գործընթացը, բայց առանց որևէ պայմանի»։
Ան ընդգծած է, թէ “Հայաստան, որ 30 տարի «գրաւած էր ազէրպայճանական հողերը» (չակերտները՝ մեր կողմէ), չունի իրաւական, քաղաքական կամ բարոյական իրաւունք սահմանազատման հարցով որևէ պայման դնելու”:
* * *
Նոյն օրը՝ Փետրուար 3-ին, լրագրողներու հարցումներուն պատասխանելու ընթացքին՝ ՀՀ Արտաքին գործոց նախարարութեան մամլոյ բանբեր Վահան Յունանեան հակադարձելով Պայրամովի վերեւ նշուած արտայայտութիւններուն՝ ըսած է, թէ երեք երկիրներու ղեկավարներուն՝ Հայաստանի վարչապետին, Ռուսաստանի նախագահին եւ Ազէրպայճանի նախագահին 2021 Նոյեմբեր 26-ին Սոչիի մէջ ստորագրած յայտարարութեամբ,– որ հրապարակային է եւ համացանցի վրայ հասանելի,– արձանագրուած է, որ այդ երեք երկիրներու ղեկավարները համաձայնած են քայլերու ձեռնարկել հայ–ազէրպայճանական սահմանի կայունութեան ու ապահովութեան մակարդակը բարձրացնելու ուղղութեամբ եւ գործընթացը տանիլ դէպի սահմանագծման եւ սահմանազատման երկկողմ յանձնաժողովի մը ստեղծումը:
Յունանեան աւելցուցած է, որ մեկնելով այս կէտէն՝ Հայաստան առաջարկներ ներկայացուցած է, որոնց ազէրպայճանական կողմը ոչ միայն բովանդակային որեւէ արձագանգ չէ տուած, այլ նաեւ մերժած է առաջարկել որեւէ տարբերակ: Ուստի, “Հայաստանի առաջարկները «պայման», «նախապայման» անուանելը, ապա դրանց վերաբերեալ բարոյական, քաղաքական, իրաւական գնահատականներ հնչեցնելը ո՛չ մի տրամաբանական կապ չունի վերը նշուած գործընթացի հետ”,– եզրակացուցած է Յունանեան:
