7 Հոգի ձերբակալուած է, իսկ 18-ամեայ դաշնակցական երիտասարդ մը երկու ամիս բանտարկութեան դատապարտուած է

Յուլիս 10-ի առաւօտեան ժամերէն սկսեալ, ոստիկանութիւնը լայնածաւալ խուզարկութիւններու ձեռնարկած է ՀՅԴ անդամներուն բնակարանները, ներառեալ՝  Ազգային ժողովի երեսփոխան Գեղամ Մանուկեանի եւ Գերագոյն մարմինի անդամ Վահագն Մատինեանի, ՀՅԴ Հայաստանի Երիտասարդական միութեան կեդրոնական վարչութեան նախագահ Գէորգ Մուրադեանի տան մէջ:

Ազգային անվտանգութեան ծառայութիւնը (ԱԱԾ) գրաւած է Գեղամ Մանուկեանի հեռաձայնը, իսկ որդին` Տարօն Մանուկեանը, ձերբակալած:

Քննչական կոմիտէն յայտարարած է, թէ ձերբակալուած է 7 հոգի, որոնք կը մեղադրուին ահաբեկչութեան նախապատրաստութեան առնչութեամբ։

Աւելի ուշ ՀՅԴ Հայաստանի Գերագոյն մարմինի Հանրային կապերու գրասենեակը հրապարակած է հաղորդագրութիւն մը, ուր մասնաւորապէս նշուած է.

«Սիրելի՛ հայրենակիցներ,

Յայտնում ենք, որ դաշնակցականների տների խուզարկութեան հետեւանքով որեւէ ապօրինի առարկայ չի յայտնաբերուել: Առգրաւուած բոլոր զէնքերը օրինական են:

Նկարներում պատկերուած առարկաների մեծ մասը, այդ թւում` նռնականման առարկան նախատեսուած է “Սթրայքպոլ” խաղի համար: Նռնականման առարկայի ներսում պահուել են “Սթրայքպոլ” խաղի համար նախատեսուած սիսեռի հատիկներ»:

Նոյն օրը «ահաբեկչութեան նախապատրաստութեան» յօդուածով ձերբակալուած 18-ամեայ Անդրանիկ Չամիչեան յաջորդ օրը երկու ամիս բանտարկութեան դատապարտուած է։

“Որեւէ անկանխատեսելի բան տեղ չունեցաւ, երկու ամսով Անդրանիկ Չամիչեանը բանտարկուեցաւ՝ «սթրայքպոլ» խաղի սիրահար լինելու համար, անունը դրեցին ահաբեկչութեան նախապատրաստութիւն։ Մինչեւ այս պահը իրաւապահները չեն պարզաբանել, թէ երիտասարդ դաշնակցականի մօտից առգրաւուած «սթրայքպոլ» խաղի սարքերով նա ինչպէս էր պատրաստւում ահաբեկչութիւն անել”,– դատական նիստէն ետք յայտարարած է վերջինիս փաստաբանը:

***

Յուլիս 13-ին, երեք օր առաջ «ահաբեկչութեան նախապատրաստութեան» գործի շրջանակին մէջ ձերբակալուած եօթը երիտասարդներէն հինգը ազատ արձակուած է, ներառեալ՝  «Հայաստան» խմբակցութեան երեսփոխան Գեղամ Մանուկեանի որդին՝ Տարօն Մանուկեան, ՀՅԴ Հայաստանի Գերագոյն մարմինի աշխատակազմի ղեկավար Վահագն Մատինեան, ՀՅԴ Երեւանի քաղաքային կոմիտէի անդամ Արսէն Մարտոյեան, քանի որ Քննչական կոմիտէն վերջիններուս տան խուզարկութենէն ետք «ահաբեկչութեան» հետ առնչութիւն ունեցող որեւէ իր չէ յայտնաբերած…։

Տարօն Մանուկեան յայտնած է, թէ տակաւին չէ հասկցած՝ ինչո՞ւ երեք օր յայտնուած է անազատութեան մէջ։ “Ուղղակի անհեթեթութիւն է։ Այս ամէնը կ՚ընեն պարզապէս ժողովուրդը լռեցնելու, վախի մթնոլորտ սերմանելու համար”,– ըսած է ան։

Փաստաբանները բողոք պիտի ներկայացնեն ապօրինի ձերբակալութիւններու դէմ։