Անոնք շնորհակալութիւններ կը փոխանակեն

Վերջին քանի մը օրերուն ակնյայտ մեղրալուսին է ԱՄՆ-ու եւ Ազերպայճանի նախագահներուն միջեւ։ 

Ինչպէս գրեցինք, անցեալ շաբաթավերջին՝ Արցախի ամբողջական հայաթափումէն շուրջ երկու տարի ետք, Ալիեւ Ստեփանակերտի մէջ, լրասփիւռներու համաշխարհային համաժողովի մը շրջանակին մէջ (զոր կոչած է Շուշիի համաժողով) հիւրընկալեց տասնեակներով երկիրներու լրագրողներ ու փորձագէտներ։ Պատասխանելով անոնցմէ մէկուն հարցումին՝ Ալիեւ պնդած է, թէ Ազերպայճանի մէջ կը սպասէին Թրամփի յաղթանակին, քանի որ անոր հետ համակարծիք են բազմաթիւ հարցերու շուրջ։

“Թրամփ միակն է ԱՄՆ-ու նախագահներէն, որ պատերազմ չսկսաւ։ Ան մէկն է, որ կ՚աւարտէ՛ պատերազմները”,– յայտարարած է Ալիեւ՝ աւելցնելով, թէ «Տանըլտ Թրամփի օրօք ԱՄՆ-ու եւ Ազերպայճանի միջեւ յարաբերութիւնները կրնան ա՛լ աւելի խորանալ ու բարձրանալ նոր մակարդակի»։

Ալիեւի այս «սիրալիր» խօսքերը անմիջապէս տեղ գտած են ԱՄՆ-ու նախագահի Truth social կայքին վրայ։ Ազերպայճանի նախագահն ալ X-ի իր հաշիւին երախտագիտութիւն յայտնած է Թրամփին, որ տարածած է գովասանքի իր խօսքերը։