Բանակը եւ եկեղեցին ամէնէն բարձր վարկանիշը կը վայելեն

Ամերիկեան Միջազգային հանրապետական հիմնարկին (IRI) Յունիս 16-25 կատարած հարցախոյզի արդիւներուն համաձայն՝ Հայաստանի բնակչութեան գրեթէ կէսը՝ 49 տոկոսը, վստահ է, որ երկիրը սխալ ուղղութեամբ կ՚ընթանայ։ Հայաստանցիներու միայն 36 տոկոսը կը կարծէ, որ երկրի զարգացումը ճիշդ ուղղութեան վրայ է։ Հարցախոյզին համաձայն՝ վերջին 9 ամիսներուն՝ 2024 Սեպտեմբերէն ի վեր, այս ցուցանիշը նուազած է 10 տոկոսով։ 

Հայաստանի մէջ տիրող կացութեան հանդէպ աւելի շատ լաւատես են տարեցները։ 56-էն բարձր տարիքային խումբին մէջ հարցապնդուածներուն 43 տոկոսը վստահ է, որ Հայաստան ճիշդ ուղղութեամբ կը շարժի, իսկ թոշակառուներու շրջանակին մէջ այս ցուցանիշը ա՛լ աւելի բարձր է՝ 47 տոկոս։ Փոխարէնը, 18-35 տարեկան հայաստանցիներու 54 եւ միջին տարիքի քաղաքացիներու 52 տոկոսը կը կարծէ, որ երկրի զարգացումը ճիշդ ուղղութեամբ չ՚ընթանար։

Ինչ կը վերաբերի քաղաքական գործիչներուն, ապա ամէնէն բարձր վարկանիշը ունի վարչապետ Նիկոլ Փաշինեան՝ 13 տոկոս։ IRI-ի նախորդ հարցախոյզին բաղդատմամբ Փաշինեանի վարկանիշը նուազած է երեք կէտով։ 2024-ին անոր կը վստահէր հայաստանցիներու 16 տոկոսը։

Նուազած է նաեւ ՔՊ-ի վարկանիշը

IRI-ի հարցախոյզին համաձայն՝ նուազած է նաեւ իշխանութեան «Քաղաքացիական պայմանագիր» կուսակցութեան վարկանիշը։ Եթէ ընտրութիւններ կայանային յաջորդ Կիրակի, ապա այս կուսակցութեան ի նպաստ պիտի քուէարկէր հայաստանցի ընտրողներու ընդամէնը 17 տոկոսը, անցեալ Սեպտեմբերին արձանագրուած 20 տոկոսին փոխարէն։

Հայաստանցիներու ճնշող մեծամասնութիւնը, սակայն, քաղաքական ոեւէ գործիչի կամ կուսակցութեան նկատմամբ վստահութիւն չի տածեր։ Հարցապնդուածներուն 61 տոկոսը ըսած է, թէ քաղաքական ո՛չ մէկ գործիչի կը վստահի։ Ինչ կը վերաբերի յառաջիկայ խորհրդարանական ընտրութիւններուն՝ հարցապնդուածներուն 28 տոկոսը յայտնած է, թէ անոնց պիտի չմասնակցի, 12 տոկոսը՝ ճերմակ պիտի քուէարկէ, իսկ 22 տոկոսն ալ ընդհանրապէս դժուարացած է պատասխանելու, թէ ի՛նչ պիտի ընէ։

Ինչ կը վերաբերի երկրին մէջ գործող հաստատութիւններուն հանդէպ վստահութեան՝ առաջին տեղը կը գրաւեն բանակն ու եկեղեցին։ Բանակին ամբողջութեամբ կամ մասամբ կը վստահի բնակչութեան 72, իսկ Հայ առաքելական եկեղեցիին՝ 58 տոկոսը։ Նախորդ հարցախոյզին բաղդատմամբ, ի դէպ, եկեղեցւոյ վարկանիշը 10 տոկոս աւելցած է։ Հայ առաքելական եկեղեցւոյ վարկանիշը ամէնէն բարձրն է 18-35 տարեկան հայաստանցիներու շրջանակին մէջ՝ աւելի քան 70 տոկոս։

Հայաստանի բնակչութեան 38 տոկոսը ամբողջութեամբ կամ մասամբ կը վստահի վարչապետի աշխատակազմին, դատարաններուն՝ 31, իսկ Ազգային ժողովին՝ ընդամէնը 24 տոկոսը։

Վերոնշեալ հարցախոյզին հեղինակները նաեւ փորձած են պարզել, թէ որո՛նք էին, ըստ Հայաստանի քաղաքացիներուն, կառավարութեան գլխաւոր ձեռքբերումները վերջին վեց ամիսներու ընթացքին։ Հարցապնդուածներուն 11 տոկոսը նշած է ճանապարհաշինութիւնը, 9 տոկոսը՝ խաղաղութեան պահպանումը, 7 տոկոսը՝ դպրոցներու եւ մանկապարտէզներու վերանորոգումը։ Հարցապնդուածներուն 42 տոկոսը, սակայն, համոզուած է, թէ վերջին վեց ամիսներուն Փաշինեանի կառավարութիւնը որեւէ նուաճում չէ արձանագրած։

Հարցախոյզին հեղինակները նաեւ անդրադարձած են Հայաստանի արտաքին գործընկերներուն։ Հայաստանցիներու ճնշող մեծամասնութիւնը՝ 89 տոկոսը դրական կը գնահատէ Ֆրանսայի, 90-ը Հնդկաստանի եւ 85 տոկոսը Իրանի հետ յարաբերութիւնները։ Ռուսաստանի հետ յարաբերութիւնները, հայաստանցիներու 55 տոկոսի համոզումով գէշ են։ Հարցապնդուածներուն միայն 43 տոկոսը կը կարծէ, որ Երեւանի եւ Մոսկուայի յարաբերութիւնները կարելի է դրական որակել։ Իսկ Հայաստանի հետ ամէնէն գէշ յարաբերութիւններ ունեցող պետութիւններու երրեակը, ըստ IRI-ի հետեւեալն է՝ Թուրքիա, Իսրայէլ, Ազերպայճան։