Հայ դատի Ամերիկայի յանձնախումբը կ՚ողջունէ ԱՄՆ-ու Գոնկրէսի աւելի քան ութսուն անդամներու երկկուսակցական նամակը, որ ըստ էութեան կը ներկայացնէ ԱՄՆ-ու քսանչորս նահանգները՝ ընդգրկելով աւելի քան 66 միլիոն ամերիկացիներ։ Անոնք ԱՄՆ-ու Արտաքին գործոց նախարար Մարքօ Ռուպիոյին կոչ կ՚ընեն՝ ապահովելու բռնագաղթուած հայերուն «համախմբուած, պաշտպանուած եւ արժանապատիւ վերադարձը» իրենց բնօրրան՝ Արցախի Հանրապետութիւն (Լեռնային Ղարաբաղ), միջազգային իրաւունքի համաձայն եւ Հարաւային Կովկասի մէջ մնայուն խաղաղութեան հաստատման նպատակով։

Նամակին նախաձեռնողներն են՝ Գոնկրէսի հայկական հարցերու խումբի համանախագահներ Ֆրենք Փալոն,  Կաս Պիլիրաքիս, Պրատ Շերման եւ Տեյվիտ Վալատաօ։

Նամակին մէջ փաստագրուած են 2023-ին Արցախի մէջ Ազերպայճանի գործադրած շրջափակման եւ սանձազերծած ռազմական յարձակման հետեւանքները, որոնց պատճառով «բռնագաղթուեցաւ ամբողջ՝ շուրջ 120.000 քրիստոնեայ հայ բնակչութիւնը»։ Աւելցուած է նաեւ, թէ յարձակումին յաջորդած է Ազերպայճանի կողմէ «համակարգուած կերպով հայկական քրիստոնէական մշակութային ժառանգութեան կոթողներուն ոչնչացումը, քաղաքացիներու սեփականութեան եւ հանրային ենթակառոյցներու աւերումը՝ նպատակ ունենալով բացառել արցախցիներու վերադարձի կարելիութիւնը»։

Գոնկրէսականները յատկապէս կոչ կ՚ուղղեն ԱՄՆ-ու վարչակազմին՝ աջակցելու Զուիցերիոյ խորհրդարանին կողմէ ընդունուած խաղաղութեան նախաձեռնութեան, որ նպատակ ունի «ստեղծել միջազգային բանակցային հարթակ՝ ապահովելու հայերուն անվտանգ, պաշտպանուած եւ միջազգային երաշխիքներով վերադարձը»։

Գոնկրէսականներուն նամակը կ՚եզրափակուի հետեւեալ յստակ պահանջով. «Մենք կ՚ակնկալենք Ձեր արձագանգը եւ պատրաստ ենք համագործակցելու Ձեզի հետ՝ խթանելու արդար եւ արժանապատիւ խաղաղութիւն տարածաշրջանին մէջ, որ պիտի ապահովէ բռնագաղթուած հայերուն հիմնական իրաւունքը՝ առանց նոր բռնութիւններու կամ հալածանքներու վախի, վերադառնալու իրենց բնօրրանը»։