Վահան Կոստանեան

Հայաստանի Արտաքին գործոց (ԱԳ) փոխնախարար Վահան Կոստանեան Պաղեստինի հարցին խաղաղ լուծման շուրջ Նիւ Եորքի մէջ կայացած միջազգային համաժողովին յայտարարած է, թէ Հայաստան կ՚ողջունէ Ֆրանսայի նախագահ Էմանիւէլ Մաքրոնի եւ Միացեալ Թագաւորութեան՝ Պաղեստինի պետութիւնը ճանչնալու մտադրութեանց շուրջ վերջին յայտարարութիւնները։

“Յատկապէս հպարտ ենք, որ Ֆրանսայի եւ Պաղեստինի ԱԳ նախարարները առիթ ունեցան հանդիպելու Հայաստան կայացած՝ «Երեւանեան երկխօսութիւն» դիւանագիտական համաժողովի շրջանակին մէջ՝ ճամբայ հարթելով այս պատմական իրադարձութեան համար”,– ընդգծած է ան, աւելցնելով հետեւեալը.

“Հայաստան համոզուած է, որ միայն երկու անկախ դրացի պետութիւններու գոյութիւնն է, որ կրնայ երաշխաւորել մնայուն կայունութիւն, անվտանգութիւն, խաղաղութիւն եւ բարգաւաճում թէ՛ Պաղեստինի, թէ՛ ալ Իսրայէլի ժողովուրդներուն համար”։

Վահան Կոստանեան նաեւ յայտարարած է, թէ Պաղեստինի վտանգուած մշակութային ժառանգութիւնը առժամաբար պիտի տեղադրուի հին ձեռագրերու գիտահետազօտական հիմնարկ-Մատենադարանին մէջ։