Արցախի ԱԺ յայտարարութիւնը 

Ապրիլ 14-ի իրիկունը, Արցախի Հանրապետութեան Ազգային ժողովը միաձայնութեամբ որդեգրած եւ հրապարակած է ստորեւ տրուած յայտարարութիւնը, որով անընդունելի կը համարէ Արցախի համար որեւէ այլ կարգավիճակ, բացի ինքնորոշումէն։

«Արցախի Հանրապետութեան ներկայի իրաւա-քաղաքական կարգավիճակը ձեւաւորուել է համաժողովրդական կամքի արտայայտութեամբ՝ երեք հանրաքուէների, դրանց արդիւնքով ընդունուած Սահմանադրութեան ազդեցութեամբ, եւ հայութեան բոլոր հատուածների միջեւ նախընթաց տարիներին հաստատուած համազգային համաձայնութեան ճանապարհով։

Արցախահայութիւնը քաջ գիտակցում է խաղաղութեան գինը։ Արցախի պետականութիւնը եւ պատմական հայրենիքում ազատ ու անկախ ապրելու իրաւունքը բացարձակ արժէքներ են, եւ դրանցից նոյնիսկ պատերազմի սպառնալիքը չի կարող մեզ ետ պահել։

Հայաստան-Ադրբեջան «խաղաղութեան» օրակարգով՝ Արցախը Ադրբեջանին բռնակցելու ցանկացած բանակցային գործընթաց ինքնին, ինչպէս նաեւ դրանից բխող փաստաթղթի ստորագրումը, տապալում է ոչ միայն Արցախի պետականութիւնը, այլեւ արցախահայութեան` իր պատմական հայրենիքում ապրելու անքակտելի իրաւունքը։

Պահանջում ենք, որ Հայաստանի Հանրապետութեան իշխանութիւնները հրաժարուեն իրենց ներկայի աղէտալի դիրքորոշումից եւ առաջնորդուեն բացառապէս այս արժէքներով։ Ո՛չ մի իշխանութիւն իրաւունք չունի “խաղաղութեան” պատրուակով Արցախի համար անընդունելի կարգավիճակի, ինչպէս նաեւ՝ միջազգայնօրէն ճանաչուած ինքնորոշման իրաւունքի բանակցային նշաձողն իջեցնելու։

Արցախահայութեան անունից դիմում ենք՝

– Աշխարհասփիւռ հայութեանը` այս արդար պայքարում միասնաբար եւ վճռականօրէն կանգնել Հայաստանի եւ Արցախի եղբայրների ու քոյրերի կողքին։

– Հայաստանի Հանրապետութեան Ազգային ժողովի մեր գործընկերներին՝ չշեղուել ՀՀ Գերագույն խորհրդի 1992թ. Յուլիսի 8-ի որոշման ուղեգծից։

– Ռուսաստանի Դաշնութեան ղեկավարութեանը` մեզ համար խիստ կարեւոր խաղաղապահ առաքելութեան ընթացքում առիթ չտալ ոեւէ մէկին շահարկել ծագող խնդիրները` որպէս Արցախի ժողովրդի հետագայ անվտանգութիւնը հարցականի տակ դնելու հիմք։

– ԵԱՀԿ Մինսկի խմբի համանախագահ երկրների ղեկավարներին` անկախ առկայ այլ տարաձայնութիւններից՝ ջանքեր գործադրել պահպանելու Լեռնային Ղարաբաղի հիմնախնդրի կարգաւորման միակ միջազգային լիազօրութիւն ունեցող ձեւաչափը»։ ■