Իրաքի Հայոց առաջնորդարանի սրահին մէջ Մայիս 13-ին, Իրաքի Հայոց թեմի առաջնորդի եւ հոգեւորականաց դասի ներկայութեամբ, Ազգային կեդրոնական վարչութեան եւ Իրաքի տարբեր մարզերէն Պաղտատ ժամանած հայ համայնքներու թաղական խորհուրդներու գումարած ժողովին կատարուած է նոր թեմակալ առաջնորդի ընտրութիւնը։ Ամենայն Հայոց կաթողիկոս Գարեգին Բ.-ի բարձր տնօրինութեամբ առաջադրուած էին երեք թեկնածուներ եւ քուէարկութեամբ Իրաքի Հայոց թեմի առաջնորդ ընտրուած է Օշական վարդապետ Կիւլկիւլեան։
Ներկաները բարձր գնահատած են քառասուն երկար տարիներ գաղութին ծառայած առաջնորդ՝ Աւագ արք. Ասատուրեանի փառահեղ եւ օգտաշատ գործունէութիւնը, իսկ նոր ընտրուած Առաջնորդին մաղթած բարի ծառայութիւն։
Նշենք, թէ Գարեգին Բ. կաթողիկոս Մայիս 24-ին հաստատած է նոր առաջնորդին ընտրութիւնը։ ■
