Եւրոպական յանձնաժողովի Արտաքին ծառայութեան պաշտօնական ներկայացուցիչ Փեթեր Սթանօ լրագրողներու հետ ասուլիսին, ի միջի այլոց, յայտնած է, թէ Ազերպայճանի իշխանութիւնները պէտք է անյապաղ հետաքննեն այդ երկրի զինուած ուժերուն կողմէ հայ ռազմագերիներու գնդակահարութեան պարագան, որու տեսանիւթը յայտնուած է համացանցին մէջ։
“Մենք կոչ կը յղենք համապատասխան մարմիններուն անյապաղ հետաքննելու փաստը: Այս տեսանիւթի դէպքը, ուր կը ցուցադրուի, թէ ինչպէս ազերպայճանցի զինուորները մահապատիժի կ՚ենթարկեն հայ զինուորները, պէտք է հետաքննուի Ազերպայճանի իշխանութիւններուն կողմէ”,– ըսած է Սթանօ:
Եւրոպական յանձնաժողովի ներկայացուցչին կարծիքով՝ եթէ հետաքննութեան արդիւնքները ցոյց տան տեսանիւթին իրական բնոյթը, ապա այդ ռազմական ոճիր է, միջազգային իրաւունքի ակնյայտ խախտում, եւ նման ոճիր պէտք է դատապարտուի։
