Հայաստանի Պաշտպանութեան նախարարութեան համաձայն՝ միջդիրքային ճամբուն վրայ յայտնաբերուած է Մայիս 26-ի իրիկուընէ ի վեր փնտռուող երկու զինուորներու կողմէ օգտագործուող թիկունքային մատակարարման կառքը բեռնուած սնունդով եւ ջուրով, նախատեսուած՝ մարտական յենակէտերու համար:

Մայիս 26-ին ազերպայճանական լրասփիւռները, ապա Պաքուի սահմանապահ ծառայութիւնը ապատեղեկութիւն հրապարակած են, որ իբրեւ թէ հայկական կողմը գրգռութեան համար ներթափանցման փորձ կատարած է, ձերբակալելով հայ երկու զինուորները: Հայկական կողմը բացարձակ սուտ եւ ապատեղեկութիւն որակած է ազերպայճանական հրապարակումները, նշելով թէ զանոնք հերքող բաւարար փաստեր ունի, որոնք պիտի ներկայացուին միջազգային կառոյցներուն։ 

Կառքին մէջ յայտնաբերուած է նաեւ զինուորներէն մէկուն զէնքը, որ ամրացուած էր նստարանի կողքին, ինչ որ ինքնին կ՚ապացուցէ, թէ զինուորները չէին կրնար գրգռութեան նպատակներ ունենալ։

Ազերպայճանի կողմէ հայ զինուորներու առեւանգման հանգամանքները բացայայտելու ուղղութեամբ լայնածաւալ աշխատանք կը տարուի։

Պաշտպանութեան նախարարութիւնը հրապարակած է նաեւ փնտռուող զինուորներուն անունները։

Սկզբնական տուեալներով՝ հակառակորդի զինեալ խումբը անցած է Հայաստանի սահմանը եւ առեւանգած զինուորները։

Նշենք, թէ Պաքու հայ-ազերպայճանական սահմանին առեւանգուած զինուորներու դէմ  քրէական գործ յարուցած է՝ ահաբեկչութեան եւ ապօրինի մաքսանենգութեան մեղադրանքով։

Հայաստան կոչ ըրած է Ազերպայճանին ազատ արձակելու առեւանգուած զինուորները

Հայաստանի Արտաքին գործոց նախարարութիւնը թուիթըրեան գրառումով կոչ ըրած է Ազերպայճանին ազատ արձակել առեւանգուած զինուորները.

«Հայաստանի զինուած ուժերի երկու զինծառայողի ապօրինի առեւանգումը Ադրբեջանի կողմից սեփական պարտաւորութիւններից խուսափելու փորձ է։ Մենք կոչ ենք անում Ադրբեջանի իշխանութիւններին՝ ազատ արձակել նրանց եւ կատարել ստանձնած պարտաւորութիւնը՝ ազատ արձակել բոլոր գերիներին՝ համաձայն 2020 թուականի նոյեմբեր 9-ի յայտարարութեան եւ միջազգային գործընկերների եւ կառոյցների կոչերի»,– նշուած է գրառման մէջ։