Հակազդեցութիւնները կը բազմապատկուին
Ազէրպայճանի նախագահ Ալիեւի՝ Յունուար 12-ին իր երկրին շարք մը լրասփիւռներու տուած հարցազրոյցի ընթացքին՝ Ֆրանսայի նախագահական ընտրութեանց հանրապետական թեկնածու, Իլ-տը-Ֆրանսի խորհուրդի նախագահուհի Վալերի Փեքրէսի հասցէին հնչեցուցած սպառնալիքներուն հակազդեցութիւնները կը բազմապատկուին։
Արդէն արձագանգած էինք CCAF-ի եւ CHREDO-ի միացեալ յայտարարութեան։ Նոյնիմաստ հաղորդագրութիւն մը հրապարակած է նաեւ Ֆրանսա-Արցախ Բարեկամութեան շրջանակը, ուր յատկապէս կ՚ըսուի, թէ ֆրանսացի ընտրեալի մը հասցէին կատարուած սպառնալիքը, ամբո՛ղջ Ֆրանսային յղուած սպառնալիք է եւ պէտք է արձագանգել որպէս այդ, ամէնէն ազդու միջոցներով։
Ի տես Ֆրանսայի իշխանութիւններուն կողմէ այս ուղղութեամբ քայլերու բացակայութեան,– կամ գոնէ յամեցումին,– Փեքրէս յայտարարած է. «Իմ հասցէին՝ Ազէրպայճանի նախագահին սպառնալիքներուն նկատմամբ [Ֆրանսայի] Կառավարութեան խլացուցիչ լռութիւնը գայթակղութիւն մըն է»։ Յունաստանէն, ուր կը գտնուէր, Փեքրէս առանց աւելի ժամանակ վատնելու՝ դատի դիմած է Ալիեւի դէմ։
Միւս կողմէ, Իլ-տը-Ֆրանսի խորհուրդի փոխնախագահ եւ Արեւելքի քրիստոնեաներու պաշտպանութիւնը համակարգող կազմակերպութեան նախագահ Փաթրիք Քարամ Յունուար 17-ին «Ֆիկառօ»-ի մէջ այս հարցին նուիրուած յօդուած մը ստորագրած է։ «Հասած է ժամանակը դիմադրելու Ազէրպայճանի եւ Թուրքիոյ յարձակողականութեան» խորագրեալ գրութեամբ ան կոչ կ՚ընէ ֆրանսական իշխանութիւններուն՝ շարժման անցնելու։ Քարամ կ՚անդրադառնայ Ալիեւի հակահայ անվերջ տրամադրութիւններուն, կը խօսի Արցախ այցելելու «յանցանք»-ով հալածանքներու ու բանտարկութեան ենթարկուած Լափշինի դրուագին, Ազէրպայճանի՝ Արցախի վրայ յարձակման, այդ նպատակաւ այդ երկրին՝ Թուրքիոյ եւ ճիհատական ահաբեկիչներու օգնութեան դիմումին եւ անոնց ալ ընդառաջման, պատերազմի աւարտին՝ հայ գերիներու ապօրինաբար պահ դրման, անոնց ենթարկուած կեղեքումներուն (ներառեալ՝ քրիստոնէութենէ հրաժարման պարտադրելու միտող՝ մարմինիններու վրայի խաչերը այրելով չարչարանքներուն), Թուրքիոյ հետ ցամաքային կապ հաստատելու միտումով՝ Զանգեզուրի միջանցք պարտադրելու, անլոյծ մնացած Արցախեան հարցին՝ Մինսքի խումբի միջնորդութիւնը մերժելու Պաքուի կեցուածքներուն, Ազէրպայճանի՝ մարդկային իրաւանց ոտնահարման միջազգայնօրէն հաստատուած նուաստացուցիչ համբաւին…։
Օվերնեը – Ռոն-Ալփ շրջանի նախագահ, իր հայամէտ դիրքորոշումներով ծանօթ Լօռան Վոքիէզ ալ դատապարտած է, նոյն հարցին նկատմամբ նախագահ Մաքրոնի անգործութիւնը։ “Ազէրպայճանի սպառնալիքները Վալերի Փեքրէսի հասցէին,– որովհետեւ ան վերահաստատեց մեր անխախտ զօրակցութիւնը հայ ժողովուրդին,– անհրաժեշտ կը դարձնեն խիստ հակազդեցութիւն մը”,– յայտարարած է Վոքիէզ։
Ծերակոյտին մէջ Հանրապետականներու խմբակցութեան նախագահ Պրիւնօ Ռըթայօ ալ յայտարարած է, թէ նախագահ Մաքրոնին հասցէագրած են նամակ մը, անոր թելադրելով Ազէրպայճանէն ներողութիւն պահանջել։ Ռըթայօ կցած է նաեւ նամակին միացած հանրապետական խորհրդարանականներու՝ երեսփոխան եւ ծերակուտական ցանկը, որ կը բաղկանայ շուրջ երկու հարիւր անուններէ։ ■
