ԱՄՆ մտահոգ է Ազերպայճանի հսկողութեան տակ գտնուող տարածքներուն մէջ հայկական մշակութային ժառանգութեան ճակատագրով

Հայկական ժառանգութիւն

Միացեալ Նահանգներու Արտաքին գործոց նախարարութիւնը Յունիս 2-ին հրապարակած է «Միջազգային կրօնական ազատութեան 2021»-ի զեկոյցը:

«Ազերպայճան» գլուխին տակ, Նախարարութիւնը կը յիշատակէ ԵԽԽՎ-ի «Լեռնային Ղարաբաղի հակամարտութեան մարդասիրական հետեւանքներուն» վերաբերեալ բանաձեւին մէջ կառոյցին արտայայտուած մտահոգութիւնը` Ազերպայճանի վերահսկողութեան տակ անցած տարածքներուն՝ տասնեակներով հայկական եկեղեցիներու, վանքերու, ներառեալ` Դադիվանքի վանական համալիրի, խաչքարերու եւ մշակութային ժառանգութեան այլ կոթողներու ապագային նկատմամբ:

Հոն կը նշուի, թէ Պաքուի կառավարութիւնը բազմիցս մերժած է արտօնել հայ ուխտաւորներուն մուտքը Դադիվանք: Ազերպայճանցիներն ալ իրենց կարգին չեն կրցած այցելել բազմաթիւ կրօնական հաստատութիւններ` ականապատման պատճառով:

ԱՄՆ-ու Արտաքին գործոց նախարարութիւնը կը յիշեցնէ ԵԽԽՎ-ի բանաձեւը եւ մտահոգութիւն կը յայտնէ Ազերպայճանի՝ պետական մակարդակով զարգացող այն պատումին գծով, որ կը ձգտի հայկական մշակութային ժառանգութիւնը փոխարինել «կովկասեան ալպանական» ժառանգութեամբ:

Զեկոյցին մէջ կ՚ընդգծուի, որ տարուան ընթացքին բազմաթիւ հաղորդումներ ստացուած են հայկական մշակութային եւ կրօնական կառոյցներու նկատմամբ վանդալական արարքներու, ինչպէս նաեւ հայկական ժառանգութեան նկատմամբ կառավարութեան դիտաւորեալ կերպով իրականացուող գործողութիւններուն մասին:

© 2022 Բոլոր իրաւունքները վերապահուած են