Արմէն Գրիգորեան.– «Սեպտեմբերից Արցախի մէջ Հայաստանից զօրակոչուած  զինուորներ չեն լինի»

Արմէն Գրիգորեան

Հայաստանի Անվտանգութեան խորհուրդի քարտուղար Արմէն Գրիգորեան կ՚ընդգծէ, որ Սեպտեմբերէն սկսեալ  Արցախի Հանրապետութեան մէջ Հայաստանէն զօրակոչուած զինուորներ պիտի չըլլան, սակայն Լեռնային Ղարաբաղէն պիտի շարունակեն զօրակոչուիլ՝ Պաշտպանութեան բանակին մէջ ծառայելու համար:

Ա. Գրիգորեան այս մասին խօսած է «Արմէնփրէս»-ին տուած հացազրոյցին։

Ստորեւ՝ հարցազրոյցը.- 

– Պարոն Գրիգորեան, վերջերս առաւել յաճախ են դարձել քննադատութիւններն առ այն, թէ Հայաստանի Հանրապետութիւնը Լեռնային Ղարաբաղից հանում է զօրքերը, այդպիսով ԼՂ-ն թողնելով անպաշտպան: Ինչպէ՞ս էք արձագանգում այս քննադատութիւններին:

– Պատերազմի ընթացքում ՀՀ Զինեալ ուժերի մի շարք ստորաբաժանումներ օգնութեան են հասել ԼՂ Պաշտպանութեան բանակին: Հրադադարի հաստատումից եւ ԼՂ-ում Ռուսաստանի խաղաղապահների տեղակայումից յետոյ ՀՀ Զինեալ ուժերի հեռացումը ԼՂ-ից տրամաբանական է:

– Բայց դա չի նշանակո՞ւմ Լեռնային Ղարաբաղն իրօք անպաշտպան թողնել:

– Ո՛չ, որովհետեւ նախկինում էլ ԼՂ անվտանգութիւնը ապահովել է ԼՂ Պաշտպանութեան բանակը: Եւ այս առումով որեւէ բան չի փոխւում: Չնայած՝ պէտք է մի բան արձանագրել, որ Լեռնային Ղարաբաղում Ռուսաստանի խաղաղապահ ուժերի տեղակայումը պէտք է անվտանգութեան երաշխիք լինի:

– Բայց Փառուխի դէպքերը ցոյց տուեցին, որ այդպէս չէ…

– Փառուխի դէպքերը 2020 Նոյեմբերի 9-ի եռակողմ յայտարարութեան եւ կիրառելի միջազգային իրաւունքի կոպիտ խախտում են: Ադրբեջանի զինեալ ստորաբաժանումները ներխուժեցին Լեռնային Ղարաբաղում Ռուսաստանի խաղաղապահ ուժերի պատասխանատւութեան գօտի: Ռուսաստանի Դաշնութիւնը մեզ հաւաստել է, որ ներխուժած ադրբեջանական ուժերը պէտք է դուրս գան այնտեղից, եւ մենք յոյս ունենք, որ խաղաղապահ ուժերը կ՚ապահովեն ապօրինի ներխուժած ադրբեջանական ուժերի հեռացումը՝ իրենց պատասխանատւութեան գօտիից: Խաղաղապահ ուժերի ներկայութիւնն ինքնին վկայում է՝ ԼՂ բնակչութեան համար իրական գոյաբանական վտանգի առկայութեան հանգամանքի ընդունում Ռուսաստանի կողմից, եւ խաղաղապահ ուժերն առանցքային նշանակութիւն ունեն ԼՂ Հայութեան անվտանգութեան երաշխաւորման գործում։

– Բայց ճիշդ հասկանալու համար. ԼՂ-ում Հայաստանի Զինեալ ուժերի ժամկէտային (պարտադիր ծառայութիւն կատարող – «ՆՅ) զինուորները փոխարինւում են պայմանագրայիններո՞վ (արհեստավարժներ – «ՆՅ»), թէ՞ ՀՀ Զինեալ ստորաբաժանումները դուրս են գալիս ԼՂ-ից:

– Ճշգրիտ լինելու համար արձանագրենք: Պատերազմի բերումով ՀՀ Զինեալ ուժերի մի շարք ստորաբաժանումներ Պաշտպանութեան բանակին օգնելու նպատակով մուտք են գործել ԼՂ: Հրադադարի հաստատումից յետոյ նրանք վերադառնում են Հայաստանի Հանրապետութիւն: Այս գործընթացը մօտ է իր աւարտին եւ Սեպտեմբերին կ՚աւարտի: Ինչ վերաբերում է Պաշտպանութեան բանակին, այն Լեռնային Ղարաբաղում է եղել եւ շարունակում է այնտեղ մնալ:

– Այսինքն՝ հայաստանեան ժամկէտային զինուորները Սեպտեմբերից յետոյ չե՞ն լինելու ԼՂ-ում:

– Ո՛չ: Բայց ԼՂ իշխանութիւններից մեր ստացած տեղեկութիւնների համաձայն՝ Լեռնային Ղարաբաղի զօրակոչիկները, ինչպէս նախկինում, զօրակոչուելու են՝ ՊԲ-ում ծառայելու համար:

– Իսկ պայմանագրայիննե՞ր:

– ԼՂ իշխանութիւններից մեր ստացած տեղեկութիւնների համաձայն՝ ինչպէս նախկինում, այնպես էլ հիմա ՊԲ-ում կը ծառայեն նաեւ պայմանագրայիններ:

– Նաեւ Հայաստանի՞ց:

– Հայաստանից ԼՂ Պաշտպանութեան բանակ պայմանագրայիններ չեն զօրակոչւում: Ըստ անհրաժեշտութեան՝ ԼՂ-ն տեղում է կազմակերպում պայմանագրային զինուորների ներգրաւում:

© 2022 Բոլոր իրաւունքները վերապահուած են