Արցախի մէջ տեղահանուածները անորոշ սպասումի մէջ են

Տակաւին զոհերու եւ վիրաւորներու յստակ թիւ չկայ

Տարեց ու երախայ, անհաշուելի թիւով կառքեր, խիտ լուացք ու կաթսաներ կրակի վրայ… Արցախի տարբեր բնակավայրերէն փախած ընտանիքները ռուս խաղաղապահներու տեղակայման վայրն են, դպրոց-համալսարաններու շէնքերուն մէջ, գետինը կը քնանան, կառքերուն մէջ, ուր որ կարելի է։

«Թոռնիկներիս հետ վախից չենք քնում, դողդողում ենք, գիշերը չենք կարողանում քնել։ Ռուսների մօտ հասել ենք, ասել են՝ էստեղ ապահով կը լինի։ 12 հոգիով ենք»,– կ՚ըսէ տեղահանուած կիներէն մէկը։

Այդ ընտանիքը հարիւրաւոր այլ ընտանիքներու հետ օդակայանի տարածքին կը գիշերէ, սնունդ չկայ, կան ուշաթափուողներ։

Ավելի քան 8 հազար քաղաքացիներ տեղահանուած են իրենց տուներէն՝ ազերպայճանական յարձակման հետեւանքով։

Մարդասիրական աղէտը կը շարունակուի։

Արցախցի կիները դժուար կ՚երեւակայեն, թէ միջանցքի բացուելու պարագային, իրենք ինչպէս պիտի մեկնին՝ այր մարդիկը ձգելով գերութեան մէջ։

Մարտական գործողութիւններէն 5 օր ետք տակաւին զոհերու, վիրաւորներու յստակ թիւ չկայ, բազմաթիւ ընտանիքներ կը փնտռեն իրենց հարազատները, որոնք ենթադրաբար մնացած են ազերպայճանական օղակի մէջ։ 

Վեց երախաներու հետ Ստեփանակերտ մնացած կինը կը սպասէ՝ ճամբու մը բացուելուն, որ մեկնի Արցախէն։ Ան կ՚ըսէ՝ չորս կողմը Ազերպայճանցիներ են, այստեղ ապրել կարելի չէ. «Բոլոր կողմն էլ իրենք են, անտառներում իրենք են, մեր տնից մի քիչ ներքեւ էլ իրենք են…»։

Ցերեկը բոլորը բակերու մէջ են, որովհետև տունը ո՛չ լոյս կայ, ո՛չ կազ, ո՛չ ալ հեռաձայնը լիցքաւորելու կարելիութիւն։ Դժուարը իրիկունը տուն մտնելն ու քնանալն է։ Տեղահանուածները նստած կը լուսցնեն, մէկ աչքերնին բաց…։

Հազարաւոր Արցախցիներ տակաւին կը գիշերեն օդակայանի եւ յարակից տարածքին մէջ

Արցախի Հանրային հեռատեսիլի պատրաստած հաղորդման համաձայն՝ հազարաւոր Արցախցիներ տակաւին կը գիշերեն օդակայանի եւ անոր յարակից տարածքին մէջ։

«Ադրբեջանի վերջին ռազմական գործողութեան հետեւանքով Արցախի տարբեր շրջաններից տարհանուած հազարաւոր մեր հայրենակիցներ շարունակում են մնալ Ստեփանակերտի օդակայանի յարակից տարածքում. հիմնականում տարեցներ, կանայք ու երեխաներ են. արդէն 5-րդ օրն է՝ ոմանք բաց երկնքի տակ են գիշերում, ոմանք մեքենաներում, որոշներն էլ վրաններ են լարել: Սնունդը, վառելափայտը, խմելու ջուրը այնտեղ հայթայթում են՝ ով ինչպես կարողանում է»,– կը հաղորդէ Հանրային հեռատեսիլը, կից հրապարակելով տեսանիւթ մը։

Արցախցիներու մէկ մասը յուղարկաւորած է իր հարազատը, մէկ մասն ալ կը մտածէ՝ ինչպէ՞ս դիերը փոխադրէ Հայաստան

Արցախցի լուսանկարիչ Դաւիթ Ղահրամանեան կը գրէ.

«Մարդիկ չգիտեն ի՛նչ անեն։ Մի մասը յուղարկաւորել է իր հարազատներին, մի մասը մտածում է, թէ ինչպէ՞ս դիակները տեղափոխի Հայաստան, մի մասն էլ մտածում է նորից հողից հանի՞ հօր, որդու, եղբօր, ամուսնու դին, թէ՞ չէ»։