Դաւիթ Բաբայեան.– “Նշաձող չունենք իջեցնելու, ունենք կարմիր գծեր եւ պէտք է դրանով առաջնորդուենք. չկայ վերադարձ անցեալին”

Հարցազրոյց Դաւիթ Բաբայեան

«Ազատութիւն» լրասփիւռի «Դիմագիրքեան ասուլիս»-ին՝ Արցախի Արտաքին գործոց նախարար Դաւիթ Բաբայեան յայտարարած է թէ՝ “Ցանկացած կարգավիճակ Ադրբեջանի կազմում բերելու է Արցախի ոչնչացմանը”,–  աւելցնելով՝ “Ադրբեջանին բռնակցելու որեւէ տարբերակ Արցախի համար կը լինի ողբերգութիւն, ցեղասպանութիւն, նոր պատերազմ”:

Ստորեւ՝ ասուլիսէն հատուածներ.-

«Արցախը չի կրնար Ազերպայճանի կազմին մէջ ըլլալ»

Դաւիթ Բաբայեան.– “Հայաստան-Ադրբեջան յարաբերութիւնները եւ ադրբեջանա-ղարաբաղեան հակամարտութիւնը իսկապէս շատ փոխկապակցուած, սակայն, առանձին գործընթացներ են։ Բայց դա չի նշանակում, որ այդ յարաբերութիւնների զարգացումը պէտք է անտեսի Արցախի հիմնախնդիրը, կամ Արցախը պէտք է այդ յարաբերութիւնների զարգացման կամ բարելաւման զուգընթաց յայտնուի Ադրբեջանի կազմում: Ի հարկէ, Բաքուի հիմնական նպատակներից մէկը սա է, եւ նա չի թաքցնում սրա մասին։ Բնականաբար, Արցախը Ադրբեջանի կազմում չի կարող լինել, չի լինելու երբեք։ Սա միանշանակ է”:

«Մշակութային ինքնավարութիւն Ազերպայճանի կազմին մէջ չի կրնար ըլլալ»

Դ.Բ.– “Արցախի իշխանութիւնների, հասարակութեան, բոլորի համար անընդունելի է Ադրբեջանի կազմում լինելը, դա բարձրաձայնուել է բազմիցս` նախագահի մակարդակով եւ ոչ միայն: Ի հարկէ, ժողովրդի անվտանգութիւնն ապահովելը լաւ է, կարգավիճակ տալը լաւ է, բայց այդ անվտանգութիւնն ու կարգավիճակը ի՛նչպիսին պիտի լինեն, այսինքն` Ադրբեջանի կազմում որեւէ կարգավիճակ չի կարող մեր անվտանգութիւնն ապահովել, ընդհակառակը` մեր գոյութիւնը դնելու են հարցականի տակ, պարզ է` ինչ է լինելու` կոտորած, պատերազմ, արիւն, հայաթափում, ցեղասպանութիւն”:

Հարցումին, թէ՝ այդ պարագային ի՞նչ խաղաղութեան օրակարգի մասին կը խօսի Արցախի նախագահը, նաեւ՝ Հայաստանի վարչապետը, նշած է որ՝ Արցախի հարցի կարգաւորումը կը տեսնէ «Արցախցին Արցախում ապրելու» իրաւունքին շուրջ։ Իսկ արդեօք այդ կը նշանակէ «մշակութային ինքնավարութի՞ւն»։ Դաւիթ Բաբայեան պատասխանած է.– “Երբ մենք խօսում ենք խաղաղութեան օրակարգի մասին, պէտք է հասկանալ, որ Արցախը գերադասում է խաղաղութիւնը պատերազմին, եւ մենք ուզում ենք, որ ամէն ինչ խաղաղ կարգաւորուի, բայց դա չի նշանակում, որ այդ խաղաղութիւնը պէտք է լինի այն, որ մենք հլու-հնազանդ Ադրբեջանի պահանջներին այո՛ պէտք է ասենք եւ համաձայնուենք լինել Ադրբեջանի կազմում, դա չի կարող լինել: Մշակութային ինքնավարութիւն Ադրբեջանում չի կարող լինել։ Մենք անցել ենք այդ ամէնը: Որեւէ կարգավիճակ Ադրբեջանի կազմում յանգեցնելու է Արցախի ոչնչացմանը”:

«Այս դարաշրջանին պէտք է առաջնորդուենք մե՛ր շահերով»

Դիմագիրքի օգտատիրոջ մը հարցումին, թէ՝ Հայաստանի իշխանութիւնները բանակցութիւններու ընթացքին մասին արդեօք տեղեակ կը պահե՞ն Արցախի իշխանութիւնները, նախարարը յայտնած է.– “Հանրապետութեան նախագահը տեղեակ է այդ գործընթացներից եւ դրանք ներկայացնում է Անվտանգութեան խորհուրդի եւ կառավարութեան նիստերին”:

Ինչ կը վերաբերի Լեռնային Ղարաբաղի կարգավիճակի հարցին մէջ նշաձողը իջեցնելու (միջազգային հանրութեան կողմէ – «ՆՅ») գծով օգտատէրերու հարցումներուն՝ Դաւիթ Բաբայեան նախ նշած է, թէ միջազգային հանրութիւնը ինքնին խայտաբղէտ հասկացութիւն է:

“Միասնական հաւաքական կարծիք այս պարագայում գոյութիւն չունի, չի կարող գոյութիւն ունենալ, յատկապէս ներկայիս, երբ միջազգային յարաբերութիւնները թեւակոխել են մերկ աշխարհաքաղաքականութեան դարաշրջան:

Կան երկրներ, որոնք շատ կ՚ուզէին, որ Արցախը գոյութիւն չունենայ առհասարակ, բայց կան երկրներ, որոնց համար կարեւորութիւն ունենք. այս դարաշրջանում պէտք է բացառապէս առաջնորդուենք մեր շահերով եւ հասկանանք, որ զգացական լինելը միմիայն վնասում է, սառը հաշուարկ, հայրենասիրութիւն, արհեստավարժութիւն, որովհետեւ մեր առջեւ կանգնած է ամենամեծ խնդիրը` փրկել այն, ինչ մնացել է, փրկում ենք ո՛չ միայն Արցախը, այլեւ Հայաստանը, որովհետեւ եթէ չլինի Արցախը, չի լինելու Հայաստանը, ժամանակի հարց է, դրա համար պէտք է հասկանանք, որ նշաձող էլ չունենք, որ իջեցնենք, նշաձող էլ չկայ իջեցնելու, մենք ունենք կարմիր գիծ: Ի՞նչ է` ընդունենք ինչ-որ երկրների առաջարկ, որոնք իրենց շահերից ելնելով ուզում են, որ Արցախը չլինի կամ լինի Ադրբեջանի կազմում, ընդունե՞նք իրենց մօտեցումը:

Ես չեմ կարծում, որ դա ճիշդ է, երբ մեզ կոտորում էին 44 օր, բա ո՞ւր էին դրանք. հետեւաբար կը ներէք, մենք էլ մեր շահն ունենք, աւելի՛ն` մեր շահն արդար է, սուրբ է, որովհետեւ մենք պէտք է փրկենք մեր երկիրը, այլ ոչ թէ մտածենք աշխարհաքաղաքական շահաբաժին ձեռք բերելու, այս կամ այն երկրի դէմ պայքար իրականացնելու մասին, դրա համար ունենք բոլոր հիմքերը` պաշտպանենք ա՛յն, ինչ ունենք:

Նշաձող չունենք իջեցնելու, մենք ունենք կարմիր գծեր եւ պէտք է դրանով առաջնորդուենք եւ հասկանանք, որ չկայ վերադարձ անցեալին”,– յայտարարած է Արցախի Արտաքին գործոց նախարարը:

© 2022 Բոլոր իրաւունքները վերապահուած են