Հայաստանի Հանրապետութեան Ազգային ժողովի նախագահ Ալէն Սիմոնեանի գլխաւորած պատուիրակութիւնը Յունիս 7-ին ընդունուած է Միացեալ Թագաւորութեան խորհրդարանի Համայնքներու պալատի նախագահ Սըր Լինտսէ Հոյլի կողմէ:
Սիմոնեան շնորհակալութիւն յայտնած է ջերմ ընդունելութեան համար, նշելով, որ Հայաստան շահագրգռուած է կայուն հիմքերու վրայ դնելով ու զարգացնելով Միացեալ Թագաւորութեան հետ բազմակողմ յարաբերութիւնները եւ նոյնը կ՚ակնկալէ հիւրընկալող երկրէն:
Հանդիպումին նշուած է, թէ երեք տասնամեակներու ընթացքին Հայաստան եւ Միացեալ Թագաւորութիւն ձեւաւորած են երկկողմ յարաբերութիւններու յաւակնոտ օրակարգ՝ հիմնուած ընդհանուր արժէքներու եւ սկզբունքներու վրայ: Ազգային ժողովի նախագահը համոզում յայտնած է, որ շուտով կը ստորագրուի կողմերու միջեւ Համապարփակ եւ ընդլայնուած համաձայնագիրը:
Նշենք, թէ հայկական պատուիրակութեան մաս կը կազմեն Ազգային ժողովի փոխնախագահ Ռուբէն Ռուբինեան, «Քաղաքացիական պայմանագիր» խմբակցութեան ղեկավար Հայկ Կոնջորեան, Հայաստան-Մեծն Բրիտանիա բարեկամութեան խումբի անդամ Արթուր Խաչատրեան եւ երեսփոխան Սոնա Ղազարեան:
