Յունիս 26-ին, Միացեալ Թագաւորութեան մէջ Հայաստանի դեսպանութեան հովանաւորութեամբ տեղի ունեցած է երկրորդ համերգը՝ յաջակցութիւն Կապանի արուեստի կեդրոնին: Առաջինը կազմակերպուած էր Մանչեսթըր՝ Յունիս 24-ին։
Ձեռնարկին նպատակն էր միջոցներ հայթայթել Կապանի արուեստի կեդրոնին նուիրելու դաշնակ մը, ապահովելով նաեւ երաժշտական համապատասխան միջավայր՝ տարածաշրջանի սկսնակ արուեստագէտներու համար:
Քենզինկթոնի Տիրամայր Յաղթանակաց եկեղեցւոյ մէջ տեղի ունեցած համերգին ներկայացուած են հայ երիտասարդ երաժիշտներու,– անոնց մէջ՝ անուանի թաւջութակահար Սեւակ Ավանէսեանի,– ուշագրաւ տաղանդները։
Դեսպան Ներսիսեան իր ելոյթին անդրադարձած է լարուած կացութեան պատճառով Կապանի եւ յարակից համայնքներուն համար ստեղծուած ծանր պայմաններուն՝ աւելցնելով, որ Կապանի արուեստի կեդրոնին տրամադրուող դաշնակը յոյս կը ներշնչէ Հայաստանի հարաւ-արեւելեան սահմանամերձ շրջաններու բնակչութեան:
Ան ընդգծած է արուեստի փոխակերպող ուժը, անոր առանցքային դերը՝ մշակոյթի զարգացման գործին մէջ:
Ներսիսեան եզրափակած է իր ելոյթը՝ խորին երախտագիտութիւն յայտնելով երաժիշտներուն, հիւրերուն, հովանաւորներուն եւ ներկաներուն, իրենց՝ արուեստին անմնացորդ նուիրումին եւ առատաձեռնութեան համար:
