Յունուար 6-ին, Վիրահայոց թեմի եկեղեցիներուն մէջ յաւուր պատշաճի նշուած է Սուրբ ծննդեան եւ Աստուածայայտնութեան տօնը։
Թիֆլիսի Սուրբ Գէորգ առաջնորդանիստ եկեղեցւոյ մէջ պատարագ մատուցած է Վիրահայոց թեմի առաջնորդ Կիրակոս վրդ. Դաւթեան:
Վիրահայ հաւատացեալներու սրբազան տօնը շնորհաւորելու եկած են նախագահուհի տիկին Սալոմէ Զուրապիշվիլի, Պետական նախարար Թէա Ախվլեդիանի, Կրօնական հարցերու պետական գործակալութեան նախագահ Զազա Վաշախմաձէ, Հայաստանի դեսպան Ռուբէն Սադոյեան, դեսպանութեան դիւանագէտներ, պետական, հասարակական գործիչներ, համայնքային կառոյցներու ղեկավարներ:
Յաւարտ պատարագի, Վիրահայոց թեմի առաջնորդը ներկաները շնորհաւորած է Ամանորի եւ Սուրբ ծննդեան տօնին առիթով և շնորհակալութեան խօսք ուղղած Վրաստանի պետութեան և կառավարութեան ներկայացուցիչներուն: Հայր Սուրբը արժեւորած է հաւատակից ժողովուրդներու հազարամեայ եղբայրական յարաբերութիւնները, հայ եւ վրաց եկեղեցիներու բարեկամութիւնը:
Վիրահայոց թեմին Սուրբծննդեան տօնակատարութիւնը լուսաբանած են վրացական զանազան լրասփիւռներ:
