Փաշինեան.– “Հայաստանը պատրաստ է հէնց այսօր ապահովել Ադրբեջանի եւ Նախիջևանի միջեւ կապը. եկէ՛ք, հատէ՛ք ՀՀ սահմանը” 

Փաշինեան-2

Օգոստոս 4-ի կառավարութեան նիստին, վարչապետ Փաշինեան անդրադառնալով Ազերպայճանի արեւմտեան շրջանի եւ Նախիջեւանի միջեւ կապը ապահովելու հարցին յայտնած է.-

“Ադրբեջանը յայտարարում է, թէ Հայաստանը պարտաւորուել է Ադրբեջանի արեւմտեան շրջանի եւ Նախիջեւանի միջեւ կապը ապահովել. այո՛, մենք այսօր էլ պատրաստ ենք այդ կապն ապահովել: Էդ Ադրբեջանն է, որ չի օգտւում մեր ընձեռած հնարաւորութիւններից: Մենք այսօր էլ ասում ենք, որ ՀՀ օրէնսդրութեամբ սահմանուած կարգով, ինչպէս կարգն է, եկէ՛ք հատէ՛ք Հայաստանի սահմանը եւ գնացէ՛ք Ադրբեջան: Մենք նաեւ դեռեւս նախորդ տարուանից ունենք մաքսային ծառայութեան կէտ եւ սահմանային ծառայութեան կէտ, եւ մենք ասել ենք Ադրբեջանին, որ որեւէ պահի այդ կէտերը կարող են հատել եւ կապ հաստատել Նախիջեւանի հետ:

Պաշտօնապէս ասում եմ՝ Ադրբեջանն այսօր մի քանի կէտերով կարող է հատել Հայաստանի սահմանը եւ երթեւեկել մինչեւ Նախիջեւան:

Եթէ բառացի ու տառացի մեկնաբանենք, նշուած է, որ մենք պէտք է ապահովենք Ադրբեջանի արեւմտեան շրջանների կապն Նախիջեւանի հետ: Ադրբեջանի ամենաարեւմտեան շրջանը Ղազախի շրջանն է, մենք պատրաստ ենք, թող գան, հատեն, գնան Նախիջեւան: Մենք երաշխաւարում ենք անվտանգութիւնը ՀՀ օրէնսդրութեամբ սահմանուած կարգով: Մենք դա կարող ենք ապահովել նաեւ Վարդենիսի հատուածում, Սիսիանի հատուածում, Երասխի հատուածում, Գորիսի հատուածում: Այս ընթացքում Ադրբեջանը չի էլ փորձել օգտուել դրանից”:

Ան նաեւ դիմած է Պետական եկամուտներու կոմիտէին եւ Ազգային անվտանգութեան ծառայութեան ղեկավարներուն՝ յանձնարարելով ապահովել Ազերպայճանի եւ Նախիջեւանի կապը. “Պարո՛ն Աբազեան եւ պարո՛ն Բադասեան, ես էլի յանձնարարում եմ, որ եւս մէկ անգամ ապահովէք Նոյեմբերի 9-ի յայտարարութեամբ այդ հնարաւորութիւնը”:

Ինչ կը վերաբերի նոր կառուցուող ճամբաներուն, վարչապետը նշած է, թէ եռակողմ յայտարարութեան մէջ յստակ ընգծուած է, որ այդ պէտք է տեղի ունենայ կողմերու համաձայնութեամբ: “Մենք ասում ենք, որ այդ ճանապարհների երթուղին համարում ենք երկրորդ հարցը, առաջինը իրաւական ընթացակարգերի ամրագրումն ու գործարկումն է”,– եզրակացուցած է վարչապետը

Փաշինեան այնուհետեւ անդրադարձած է եռակողմ յայտարարութեան մէջ ամրագրուած «Լեռնային Ղարաբաղ միաւոր»-ի անվտանգութեան կարեւոր դրոյթներուն.-

“Որքան էլ քննադատուի 2020 թուականի Նոյեմբերի 9-ի եռակողմ յայտարարութիւնը, դրանում Լեռնային Ղարաբաղի անվտանգութեան կարեւոր ինստիտուտներ են ամրագրուած: Նախ՝ Լեռնային Ղարաբաղ միաւորի արձանագրումն է տեղի ունեցել, ինչը մինչեւ հիմա փորձում է ժխտել Ադրբեջանը՝ ասելով, թէ Լեռնային Ղարաբաղ գոյութիւն չունի: Ադրբեջանից հնչող նմանատիպ յայտարարութիւնները, ի դէպ, եռակողմ յայտարարութեան կոպտագոյն խախտում են:

Երկրորդը՝ արձանագրուել է, որ գոյութիւն ունի շփման գիծ եւ երրորդը՝ Լաչինի միջանցք, որը ապահովում է Լեռնային Ղարաբաղի կապը Հայաստանի հետ: Ըստ էութեան, այս երեք ինստիտուտների դէմ է Ադրբեջանի այսօրուայ պայքարը, եւ մեր ակնկալիքն է, որ ինչպէս եւ նախատեսուած է եռակողմ յայտարարութեամբ, Ռուսաստանի Դաշնութեան խաղաղապահ զօրախումբը Ադրբեջանին հնարաւորութիւն չտայ խաթարելու եռակողմ յայտարարութեամբ արձանագրուած այս հիմնարար ինստիտուտները”:

© 2022 Բոլոր իրաւունքները վերապահուած են