Ֆրանսայի Արտաքին գործոց նախարարութիւնը պատասխանելով Մինսքի խումբի ապագային առնչուող հարցումի մը, յայտարարած է որ՝ Ֆրանսա կը վերահաստատէ իր լիակատար յանձնառութիւնը Հարաւային Կովկասի տարածաշրջանի խաղաղութեան եւ կայունութեան հաստատման, ինչպէս երկկողմ հիմքով, այնպէս ալ որպէս Եւրոպական Միութեան խորհուրդի նախագահ եւ Մինսքի խումբի համանախագահ։

«Այդ կարգավիճակով Ֆրանսա կը շարունակէ աշխատիլ Հայաստանի եւ Ազէրպայճանի հետ, որպէսզի լուծում գտնուի մարդասիրական հարցերուն, եւ կը շարունակէ աջակցիլ սահմանազատման աշխատանքներուն, տարածաշրջանի մեկուսացումը վերացնելու գործընթացին, ժառանգութեան պահպանման, երկու երկիրներու միջեւ խաղաղութեան պայմանագրի կնքման եւ Լեռնային Ղարաբաղի հիմնախնդրի կարգաւորման։ Այդ նպատակով Փետրուար 4-ին, Հանրապետութեան նախագահին նախաձեռնութեամբ, տեսաժողովի ձեւաչափով հանդիպում կազմակերպուած էր Հայաստանի վարչապետին, Ազէրպայճանի նախագահին եւ Եւրոպական խորհուրդի նախագահին հետ։ Մինսքի խումբին ֆրանսացի համանախագահը այս օրերուն աշխատանքային այցով Երեւան կը գտնուի»,– նշուած է յայտարարութեան մէջ։ ■