Մայր Աթոռի տեղեկատուական համակարգը խոր ցաւով կը տեղեկացնէ, թէ Յունուար 3-ին, 89 տարեկանին վախճանած է Սուրբ Էջմիածնի երիցագոյն միաբաններէն Արիս արքեպիսկոպոս Շիրվանեան:

«Գարեգին Բ. Ամենայն Հայոց կաթողիկոսը ու Մայր Աթոռի միաբանութիւնը կը սգան բազմավաստակ եկեղեցական՝ Տ․ Արիս արքեպիսկոպոս Շիրվանեանի մահը, եւ կ՚աղօթեն անոր հոգւոյն հանգստութեան համար։

Յունուար 8-ին, յընթացս Սուրբ պատարագին կը կատարուի Արիս արքեպիսկոպոսի վերջին օծման եւ թաղման կարգը՝ Մայր Աթոռի միաբանական գերեզմանատան մէջ»,– նշուած է Մայր Աթոռի հրապարակած հաղորդագրութեան մէջ։

Արիս արքեպիսկոպոս Շիրվանեան (աւազանի անունով` Արմենակ) ծնած է 1934 Յուլիս 23-ին Հայֆա: Նախնական կրթութիւնը ստացած է Հայֆայի Սուրբ Եղիա դպրոցը, ապա` Լիբանանի Պուրճ Համմուտի «Ս. Քառասուն Մանկանց» վարժարանը:

1952-1957 Երուսաղէմի Հայոց Պատրիարքութեան Սրբոց Ժառանգաւորաց վարժարանը աւարտելէ ետք ձեռնադրուած է կուսակրօն քահանայ՝ միանալով Երուսաղէմի Սրբոց Յակոբեանց միաբանութեան:

1974-ին եպիսկոպոս ձեռնադրուած է ձեռամբ Վազգէն Ա. Ամենայն Հայոց կաթողիկոսի, իսկ 2006-ին արքութեան աստիճանի արժանացած է Գարեգին Բ. Վեհափառ հօր Հայրապետական կոնդակով։

1957-ին՝ եղած է Երուսաղէմի Ժառանգաւորաց վարժարանի փոխտեսուչ եւ դասախօս, 1958-ին՝ հոգեւոր հովիւ Ամմանի (Յորդանան) Ս. Թադէոս հայկական եկեղեցւոյ, տնօրէն՝ Հեթումեան հայկական դպրոցի: 1966-ին՝ Լոս Անճըլըսի (ԱՄՆ) Ս. Յակոբ հայկական եկեղեցւոյ հոգեւոր հովիւ։ 1972–1974՝ դասախօս, փոխտեսուչ, ապա` տեսուչ Ս. Էջմիածնի Գէորգեան հոգեւոր ճեմարանի։ 1975–1979՝ Գանատայի Հայոց թեմի առաջնորդական փոխանորդ: 1979–1980՝ Կալկաթայի հայկական ճեմարանի տեսուչ։ 1998–1999՝ Երուսաղէմի Ժառանգաւորաց վարժարանի տեսուչ: 2012-ին՝ Երուսաղէմի Հայոց Պատրիարքութեան տեղապահ։ 2013-ին՝ Երուսաղէմի Հայոց Պատրիարքութեան միջեկեղեցական  ու արտաքին յարաբերութիւններու բաժնի տնօրէն եւ մամլոյ բանբեր: