Հանրային հեռատեսիլի խորհուրդը Յունուար 3-ին հրապարակած է ստորեւ տրուած յայտարարութիւնը՝ Գարեգին Բ. Վեհափառ հօր ուղերձի չհեռարձակուելուն կապակցութեամբ, ի տես՝ Կաթողիկոսի ելոյթին բացակայութեան շուրջ ծայր առած բանավէճին.

«Դեկտեմբեր 31-ին Հանրային հեռուստաընկերութիւնը ծրագրել էր հեռարձակել Ամենայն Հայոց կաթողիկոս Գարեգին Բ.-ի ուղերձը ամենադիտուող հատուածներից մէկում՝ պաշտօնական ուղերձների համար այս տարի առանձնացուած  ժամին։ Կաթողիկոսի ելոյթը պէտք է յաջորդէր Սահմանադրութեամբ պետութեան գլուխ հանդիսացող Հայաստանի նախագահի ելոյթին։

Ցաւօք, Դեկտեմբեր 31-ին Մայր Աթոռի անունից Տէր Վահրամ քահանայ Մելիքեան Հանրային հեռարձակողի խորհրդին տեղեկացրել է, որ անհամաձայնութիւն են յայտնում ուղերձների համար նախատեսուած ժամի վերաբերեալ եւ պահանջում են չհեռարձակել եւ ընդհանրապէս չօգտագործել Կաթողիկոսի ուղերձի տեսագրութիւնը, որի հեղինակային իրաւունքները պատկանում են Մայր Աթոռին։

Քանի որ պահանջը միայն Հանրային հեռուստաընկերութեանն էր առնչւում, Խորհրդին ենթակայ «Շողակաթ» հեռուստաալիքը եւ Հանրային ձայնասփիւռը ուղերձը հեռարձակել են, իսկ Հանրային հեռուստաընկերութեան եթերի վերաբերեալ բանաւոր դիմումը բաւարարուել է։

Ամանորեայ ուղերձների հեռարձակման վերաբերեալ Հայաստանում չկայ օրէնսդրական կարգաւորում, եւ հէնց դա է պատճառը, որ իւրաքանչիւր հեռուստաընկերութիւն ինքն է որոշում, թէ երբ եւ ինչ հերթականութեամբ հեռարձակի ուղերձները, ինչն էլ տեղի է ունեցել: Հաշուի առնելով հանրային լայն արձագանգը՝ առաջարկում ենք խնդիրը կարգաւորել օրէնսդրական դաշտում:

Ափսոսում ենք այս միջադէպի համար եւ յոյս ունենք, որ այն որեւէ կերպ չի անդրադառնայ Հանրայինի եւ Մայր Աթոռի  համագործակցութեան վրայ»։