Արցախի Մարդկային իրաւանց պաշտպան Գեղամ Ստեփանեանի արձագանգը՝ Ալիեւի յայտարարութիւններուն
«Արցախի Հանրապետութեան պետականութիւնն ու պետական մարմինները ձեւաւորուել են Արցախի ժողովրդի կամարտայայտութեամբ՝ ինքնորոշման բնական իրաւունքի իրացման ճանապարհով եւ միտում ունեն սպասարկելու Արցախի ժողովրդի հիմնարար իրաւունքներին ու ազատութիւններին։
Դրանց դէմ Ադրբեջանի նախագահի վերջին յայտարարութիւնները եւ դրանցում պարունակուող սպառնալիքները փաստօրէն եւս մէկ անգամ բացայայտում են, թէ ինչ նպատակներ են թաքնուած բանակցութիւնների ժամանակ “իրաւունքների եւ անվտանգութեան ապահովման” ադրբեջանական խոստումների ներքոյ։
Ալիեւի յայտարարութիւնները ազդակ պէտք է լինեն հակամարտութեան կարգաւորման մէջ ներգրաւուած բոլոր կողմերի համար, որ առանց Արցախի ժողովրդի ինքնորոշման իրաւունքի ճանաչման, այլ իրաւունքների եւ ազատութիւնների ապահովման մասին խօսակցութիւնները հիմնազուրկ են եւ իրականութիւնից կտրուած։ Աւելի՛ն, դրանք Ադրբեջանի կողմից օգտագործւում են հայատեացութեան օրակարգը եւ Արցախի ժողովրդի նկատմամբ վարուող ցեղային զտման քաղաքականութիւնը քօղարկելու համար։
Ինչպէ՞ս կարող է ողջամիտ մէկը հաւատալ, որ քաղաքացիական անձանց դաժանաբար սպանողը, հայկական մշակութային արժէքների եւ նոյնիսկ հայկական գերեզմանների դէմ պատերազմ վարողը կամ շուրջ կէս տարի Արցախի ժողովրդին դիտաւորեալ շրջափակման մէջ պահող ու առանց կազի եւ ելեկտրականութեան թողած Ադրբեջանը կարող է իրաւունքներ եւ անվտանգութիւն ապահովել։
Իրողութիւնները առաւել քան պարզ են ու հասկանալի․ Ադրբեջանը չի էլ թաքցնում իր նպատակները։ Յիշեցնում եմ բոլոր այն կողմերին, որոնք, այս պարզ ճշմարտութիւնները հասկանալով հանդերձ, չտեսնելու են տալիս կամ դիտաւորեալ զբաղւում են ինքնախաբէութեամբ։ Մարդկութեան դէմ ուղղուած յանցագործութիւնները կանխելու պատասխանատւութիւն ունի միջազգային հանրութիւնը, իսկ այդ պատասխանատւութեան ձախողումը բոլորի յանցանքն է»,– գրած է Ստեփանեան։
