ԱՄՆ Միջազգային հանրապետական հիմնարկի (IRI) նոր մէկ հացախոյզին արդիւնքները հետեւեալ պատկերը կը պարզեն։ Նշենք, թէ հարցապնդուած են 1512 քաղաքացիներ, Նոյեմբեր 22-էն Դեկտեմբեր 5-ի ժամանակահատուածին։

Քաղաքացիները ամէնէն աւելի գոհ են մարդկային իրաւանց պաշտպանի (ՄԻՊ) գրասենեակի աշխատանքէն՝ 68% (35%-ը ամբողջովին գոհ է, 33%-ը՝ որոշ չափով գոհ): Յաջորդը ոստիկանութիւնն է, որ հարցապնդուածներուն 68%-ի դրական պատասխանին արժանացած է, բայց ի տարբերութիւն ՄԻՊ–ի՝ ոստիկանութեան աշխատանքէն ամբողջովին գոհ է 25%-ը, որոշ չափով գոհ՝ 43%-ը։ Երրորդը՝ տեղական ինքնակառավարման մարմիններն են, որոնց աշխատանքէն շատ գոհ է 22%-ը, որոշ չափով գոհ՝ 41%-ը։ Քաղաքացիները ամէնէն աւելի դժգոհ են Ազգային ժողովի աշխատանքէն․ «չափազանց դժգոհ» է 50%-ը, 17%-ը՝ «որոշ չափով» դժգոհ։

Վարչապետի գրասենեակի աշխատանքէն շատ գոհ կամ որոշ չափով գոհ է 49%-ը, 48%-ը դժգոհ է կամ չափազանց դժգոհ, 4%-ը մերժած է պատասխանել այս հարցումին։ Վարչապետի գրասենեակի աշխատանքէն աւելի շատ գոհ են 56 տարեկանէն վեր մարդիկ և գիւղաբնակները։ Հարցախոյզի մասնակիցները որոշ չափով աւելի դժգոհ են կառավարութեան աշխատանքէն։ Եթէ վարչապետի աշխատանքէն շատ գոհ է 19%-ը, որոշ չափով գոհ՝ 30%-ը, ապա կառավարութեան պարագային 13%-ը շատ գոհ է, 35%-ը՝ որոշ չափով գոհ։

«Որքանո՞վ բաւարարուած էք կամ դժգոհ զինեալ ուժերու աշխատանքէն» հարցումին, 58%-ը պատասխանած է, թէ ամբողջովին կամ որոշ չափով գոհ է, 37%-ը՝ դժգոհ կամ որոշ չափով դժգոհ։ Բանակի ղեկավարութեան աշխատանքի վերաբերեալ հարցումի պարագային, սակայն, պատկերը հակառակն է՝ 40%-ը գոհ է, 54%-ը՝ դժգոհ։

Հայաստանցիներու 34 տոկոսը համամիտ է որ՝ Արցախը միանայ Հայաստանին,
11 տոկոսը՝ Ռուսաստանին

Արցախին (հարցախոյզին մէջ՝ Լեռնային Ղարաբաղ) վերաբերեալ հարցումները կը վերաբերին հակամարտութեան կարգաւորման եւ լուծման ընդունելի տարբերակին։

Այսպէս, հարցապնդուածներուն 35 տոկոսին կարծիքով ընդունելի տարբերակ է Լեռնային Ղարաբաղի՝ իբրեւ անկախ պետութիւն ճանաչումը։

34 տոկոսի կարծիքով՝ ընդունելի տարբերակ է Լեռնային Ղարաբաղի միացումը Հայաստանին՝ որպէս շրջան։

Հայաստանի կազմին մէջ Լեռնային Ղարաբաղի՝ իբրեւ ինքնավար շրջանի կարգավիճակի հաստատման ի նպաստ արտայայտուած է հարցապնդուածներուն 16 տոկոսը։

Ռուսաստանի կազմին մէջ Լեռնային Ղարաբաղի կարգավիճակի հաստատման վերաբերեալ՝ դրական պատասխանած է հարցապնդուածներուն 11 տոկոսը։

Ներկայի status quo-ի պահպանման կողմնակից է մասնակիցներուն 1 տոկոսը։

Հարցապնդուածներուն 82 տոկոսին կարծիքով ղարաբաղեան հակամարտութեան կարգաւորումը շատ կարևոր է Հայաստանի ապագային համար՝ յառաջիկայ տասը տարիներուն։