Հայաստանի Տնտեսական նախարար Գէորգ Պապոյեան ներկայացուցած է տարեսկիզբէն մինչեւ Սեպտեմբեր 29 Հայաստանէն արտածուած պտուղներու, բանջարեղէններու եւ ծաղիկներու քանակը։

Այս տարի Հայաստանի արտածած բանջարեղէններուն գրեթէ 100%-ը ջերմոցային արտադրանք է։

Ան նշած է, որ մինչեւ Սեպտեմբեր 29, Հայաստանէն արտածուած է 121.800 թոն պտուղ եւ բանջարեղէն՝ անցեալ տարուան նոյն ժամանակաշրջանի 108.600 թոնին հետ բաղդատած՝ արձանագրելով 12,2% աճ։

“Մինչեւ Սեպտեմբեր 29, լոլիկի արտածումը աւելցած է 1.000 թոն (8% աճ), պղպեղինը՝ 4.500 թոն (59% աճ), իսկ սմբուկինը՝ 800 թոն (80% աճ)”, նշած է նախարարը։

Ինչ կը վերաբերի ծաղիկներուն, արտածուած է 3,1 միլիոն հատ, որ կը նշանակէ 5,3% աճ։ Պապոյեան աւելցուցած է, որ ծիրանի արտածումը աւելցած է 11.000 թոն (33% աճ), սալորինը՝ շուրջ 2.000 թոն (32% աճ), դեղձինը՝ 5.100 թոն (86% աճ) եւ բալինը՝ 2.000 թոն (87% աճ)՝ նախորդ տարուան համեմատութեամբ։