Իրանի Իսլամական յեղափոխութեան առաջնորդ Այաթոլլահ Խամենէիի միջազգային հարցերու աւագ խորհրդական Ալի Աքպար Վելայաթի «Թանսիմ» կայքին վրայ հրապարակուած յօդուածին մէջ նշած է, թէ Նախիջեւանը Ազերպայճանին կապելու նպատակն է նախ Հայաստանը երկուքի բաժնել, երկրորդը՝ բաժնել Իրանը Հայաստանէն, կտրելով այն կապը, որ սկիզբ առած է Աքեմենեան եւ Պարթեւական կայսրութիւններու դարաշրջանէն։ Երրորդը՝ ատոր հետեւանքով կը խափանուի Իրանի ազատ կապը Հիւսիսային Կովկասի, Ռուսաստանի եւ Եւրոպայի ցամաքամասին հետ։
Ան աւելցուցած է. «Ռուսաստան պէտք է զգուշ ըլլայ եւ գիտնայ, թէ Կովկասի մէջ որեւէ փոքր անփութութիւն զայն կը դարձնէ ներխուժման եւ մրցակցութեան վայր տարբեր երկիրներու եւ չարամիտ կողմերու միջեւ, որոնք հարուած պիտի հասցնեն Ռուսաստանի եւ Իրանի պետութեան շահերուն»:
