ՀԱՂՈՐԴԱԳՐՈՒԹԻՒՆ

Մեծ հպարտութեամբ կը հաղորդենք, որ Պէյրութի Հայ կաթողիկէ Մեսրոպեան բարձրագոյն վարժարանը 26 Յունիս 2025-ին պաշտօնապէս ստացաւ Ֆրանսայի Կրթութեան նախարարութեան ճանաչումը՝ homologation-ի վկայագիրը, այսպԷսով բարեյաջող աւարտին հասցնելով երկար տարիներէ ի վեր այս նպատակի իրականացման համար տարուած հսկայական աշխատանքը։

«Այսօրուան ձեռքբերումը պատմական էջ մըն է Մեսրոպեանի կեանքին մէջ»,– նշեց վարժարանի տնօրէն պարոն Կրէկուար Գալուստ։ «Ան կու գայ հաստատելու մեր վաղեմի տեսլականը՝ ապահովել բարձրորակ, քառալեզու կրթութիւն, որ միաժամանակ արմատաւորուած ըլլայ Հայ ազգային ինքնութեան ու դաստիարակութեան մէջ եւ համապատասխանէ համաշխարհային չափանիշերուն»,– ըսաւ ան:

Այս յատուկ ու բարձրագոյն ճանաչումը աննախադէպ իրադարձութիւն մըն է ոչ միայն Մեսրոպեանի, այլ նաեւ ամբողջ սփիւռքահայութեան կրթական պատմութեան մէջ, քանի որ մեր վարժարանը կը դառնայ առաջին հայկական կրթական հաստատութիւնը հայ սփիւռքին մէջ, որ կը ստանայ այսպիսի պետական մակարդակի վաւերացում։

Homologation-ը առաջին հերթին կը վերաբերի Մեսրոպեանի մանկապարտէզին․ հանգրուան առ հանգրուան, ան պիտի տարածուի բոլոր բաժանմունքներուն վրայ՝ մինչեւ աւարտական դասարան, ամբողջ կրթութիւնը համապատասխանեցնելով Ֆրանսայի հանրապետութեան կրթական ծրագերուն, չափանիշերուն եւ ուսումնական պայմաններուն։

Homologation-ը արդիւնք է երկար տարիներու անխոնջ աշխատանքին, որուն լծուած էին վարժարանի տնօրէնութիւնը եւ ուսուցիչները՝ ծնողներու մշտական աջակցութեամբ։ Անոր իմաստն ու կարեւորութիւնը մեր աշակերտներուն համար հսկայական է։ Վարժարանի այս ճանաչումը անոնց համար կը բանայ նոր հորիզոններ՝ կրթական եւ մասնագիտական լաւագոյն ապագայի կազմաւորման, ֆրանսախօս համալսարաններ մուտքի դիւրացման, վկայականի միջազգային ճանաչման եւ կրթութեան որակի հաւաստիացման առումով։

Այս նուաճումը կու գայ անգամ մը եւս հաստատելու, որ Մեսրոպեան վարժարանը կը մնայ հաւատարիմ իր առաքելութեան՝ դաստիարակել կիրթ, բազմալեզու եւ պատասխանատու նոր սերունդ մը, որ ի վիճակի ըլլայ համադրելու իր հայ ու համամարդկային ինքնութիւնները՝ յանուն արժանապատիւ եւ բարեկեցիկ ապագայի։

Յիշեցնենք, որ 2025-2026 տարեշրջանին, Մեսրոպեանի մէջ նաեւ պիտի սկսի գործադրուիլ Ֆրանսական պետական Պաքալօրէայի ծրագիրը (Bacc․ Français, 10-րդ դասարանէն սկսեալ), որ ինքնին մաս կը կազմէ Ֆրանսայի Կրթութեան նախարարութենէն բոլոր բաժիններուն համար homologation ստանալու վարժարանի ծրագրին։

Տեղեկատուական գրասենեակ
Հայ կաթողիկէ Մեսրոպեան բարձրագոյն վարժարանի