Օգոստոս 30-ին, Հայաստանի Հանրապետական կուսակցութեան (ՀՀԿ) փոխնախագահ Արմէն Աշոտեան Եւրոպական Միութեան դեսպանատան առջեւ լուռ ու միայնակ ցոյց ըրած է։ Դիմագիրքեան ուղղակի հաղորդման՝ ան ըսած է, թէ ցոյցը նուիրուած է Երեւանի եւ Պաքուի մէջ պահուող հայ պատանդներուն, ռազմագերիներուն ու քաղաքական բանտարկեալներուն ազատութեան:

“Այն արժէքները, որոնք քարոզուել ու ներկայացուել են որպէս ոչ միայն եւրոպական ու համամարդկային արժէքներ մեր երկրում տասնեակ տարիներ շարունակ, այսօր ոտնահարւում, անտեսւում են հէնց այն կառոյցի կողմից, որ այդ արժէքների ենթադրաբար կրողը պիտի լինէր”,– նշած է ան:

Աշոտեանի համաձայն՝ Պրիւսէլէն ճնշումներ չեն գործադրուիր ո՛չ Պաքուի, ո՛չ Երեւանի վարչակազմին նկատմամբ՝ պատանդներու եւ միւս քաղաքացիներու ազատ արձակման նպատակով: Ան նաեւ հաղորդած է, թէ ցոյցը տեղի կ՚ունենայ Արցախի նախկին նախագահ Բակօ Սահակեանի ծննդեան օրը՝ Օգոստոս 30-ին։