Հոկտեմբեր 6-ին, Գարեգին Բ. Ամենայն Հայոց կաթողիկոսը Վատիկանի մէջ հանդիպում ունեցած է Հռոմի Փրանկիսկոս պապին հետ։ Կաթողիկոսը անդրադարձած է 44-օրեայ պատերազմի աղէտալի հետևանքներուն, Հայաստանի և Արցախի առջև ծառացած մարտահրաւէրներուն, յատկապէս շեշտելով ռազմագերիներու և յետպատերազմեան շրջանին գերութեան մէջ յայտնուածներու վերադարձի հրատապ հարցը։ Գարեգին Բ. նաև շնորհակալութիւն յայտնած է Պապին, պատերազմի օրերուն հայ ժողովուրդին և Հայաստանին ցուցաբերած աջակցութեան համար։
Այնուհետև Հայոց Հայրապետին գլխաւորած պատուիրակութիւնը տեսակցութիւն ունեցած է նաև Վատիկանի պետական քարտուղար կարդինալ Փիեթրօ Փարոլինի հետ։ Մասնաւորապէս արծարծուած են Արցախի ժողովուրդի անվտանգութեան, Հայաստանի ինքնիշխան տարածքներու նկատմամբ թշնամիի ոտնձգութիւններուն, ինչպէս նաև Ազէրպայճանի վերահսկողութեան տակ անցած տարածքներուն մէջ հայկական հոգևոր-մշակութային ժառանգութեան պահպանման վերաբերող հարցեր։
Առկայ մարտահրաւէրներու և խնդիրներու յաղթահարման գործին մէջ Ամենայն Հայոց կաթողիկոսը շատ կարևոր գնահատած է միջազգային հանրութեան դերակատարութիւնը։
