Փետրուար 4-ին, Թումօն և գերմանական KfW զարգացման դրամատունը պայմանագիր ստորագրած են, որուն համաձայն Գերմանիոյ` Թումօ Պէրլինի յաջող փորձառութեան հիմքով, կը հիմնադրուի Թումօ կեդրոններու և տուփերու ցանց։

Երեւանի Թումօ կեդրոնին մէջ տեղի ունեցած արարողութեան ընթացքին, KfW-ի թուային ուղղութեան ղեկավար Մայքըլ Շթրաուս նշած է.– “Թումօ Պէրլինի բացումը առաջին և նշանակալից քայլն էր, որ հիասքանչ կարելիութիւններ ընձեռեց քաղաքի պատանիներուն: Այսօր ստորագրուած պայմանագիրը մեծ յառաջխաղացք է, քանի որ այս ծրագիրը առիթ կու տայ տարածելու Պէրլինի արդիւնաւէտ փորձառութիւնը ամբողջ Գերմանիոյ տարածքին”:

Արարողութեան ներկայ եղած է Հայաստանի մէջ Գերմանիոյ փոխդեսպան Քլաուս Վենտելպերկեր, Թումօ ստեղծարար արհեստագիտութիւններու կեդրոնի ղեկավարութիւնը և KfW զարգացման դրամատան ներկայացուցիչներ։

Թումոյի զարգացման հարցերու տնօրէն Բեկոր Փափազեան նշած է, թէ «KfW-ն մեր առաջին միջազգային գործընկերն է, որ կ՚որդեգրէ Թումոյի՝ իբրեւ ազգային նախաձեռնութիւն տարածուելու յղացքը»։

Պէրլինի մէջ ներկայիս գործող Թումօ կեդրոնի բացման պատմութիւնը սկսած է 2018-ին, երբ Գերմանիոյ վարչապետուհի Անկելա Մերքել այցելեց Թումոյի Երևանի կեդրոնը։ Թումօ Պէրլինի պաշտօնական բացումը տեղի ունեցաւ 2020 Յունուարին՝ սկիզբ հանդիսանալով Թումոյի և KfW-ի համագործակցութեան։

Գերմանիոյ ապագայ կեդրոնները կը հետևին Թումօ Պէրլինի փորձառութեան՝ 12-18 տարեկան պատանիներուն առաջարկելով կրթութիւն հետեւեալ տասը ոլորտներուն մէջ.-

Ծրագրաւորում, երաժշտութիւն, ռոպոթաշինութիւն,  կենդանապատկերներու (animation), եռաչափ կաղապարում (3D modelling), ֆիլմերու ստեղծում, լուսանկարչութիւն, խաղերու մշակում, graphic design եւ լուսանկարչութիւն։

Թումոյի՝ Ֆրանսայի, Ռուսաստանի, Ալպանիոյ, Ուքրաինայի և Լիբանանի մէջ գործող միջազգային ցանցը յաջորդիւ պիտի հարստանայ ԱՄՆ-ու եւ Փորթուկալի ցանցերով։