Հ.Մ.Ը.Մ. Ֆրան­սի մշա­կու­թա­յին եւ մար­զա­կան կեդ­րո­նին,– որ կը գտնուի Իսի-լէ-Մու­լի­նօ, Ռա­պըլէ փո­ղոց թիւ 9 հաս­ցէին,– պաշ­տօ­նական բա­ցու­մը տե­ղի ու­նե­ցաւ Շա­բաթ, 22 Նո­յեմ­բեր 2025-ին։ Այս իրա­դար­ձութիւ­նը պատ­մա­կան ան­կիւնա­դարձ մը կը նշէ միու­թեան հա­մար՝ Եւ­րո­պայի տա­րած­քին՝ իր տե­սակին մէջ առա­ջին հա­մալի­րի բա­ցու­մով։

Արա­րողու­թեան ներ­կայ գտնուեցան Հ.Մ.Ը.Մ. Ֆրան­սի վար­չութեան ան­դամնե­րը, նախ­կին վա­րիչ­ներ, սկաուտներ, ինչպէս նաեւ երէ­կուան ու այ­սօ­րուան մար­զիկներ՝ շրջա­պատուած տեղ­ւոյն հայ հա­մայնքով։

Ձախէն՝ Լեւոն Պաղտասարեան, Յակոբ Խաչերեան, Հուսսամ Հարիրի, Հրաչ Սիսեռեան եւ Յարութ (Արթիւր) Խանճեան կը կտրեն ժապաւէնը

Փա­ռահեղ եւ յու­զիչ արա­րողու­թիւն մը

Շուրջ 1200-1300 հոգի գնա­հատուած խուռ­նե­րամ բազ­մութեան մը ներ­կա­յու­թեամբ, բա­ցու­մը սկսաւ ժա­պաւէ­նի աւան­դա­կան հա­տու­մով, որուն յա­ջոր­դեց սկաու­տա­կան տո­ղանց­քը։ Յու­զումը շօ­շափե­լի էր Ֆրան­սա­յի, Հա­յաս­տա­նի եւ Ար­ցա­խի փա­ռեր­գե­րու կա­տար­ման ըն­թացքին, որոնք փայ­լուն կեր­պով մեկ­նա­բանուեցան սոփ­րա­նօ Լու­սի­նէ Լե­ւոնիի կող­մէ, եւ որոնց ան­մի­ջապէս յա­ջոր­դեց Հ.Մ.Ը.Մ.-ական­նե­րու քայ­լերգը՝ «Յա­ռաջ Նա­հատակ»-ը, զոր միաս­նա­բար եր­գե­ցին սկաուտներն ու ներ­կա­ները։

 

Գրիգոր եպիսկ. Խաչատրեան կ՚օրհնէ կեդրոնը

Յատ­կանշա­կան ելոյթներ

Այնուհետեւ, Ֆրան­սա­յի Հա­յոց թե­մի առաջ­նորդ Գրի­գոր եպիսկ. Խա­չատ­րեան, ըն­կե­րակ­ցութեամբ Տէր Աւե­տիսի (Իսի-լէ-Մու­լի­նօ) եւ Տէր Տի­րայ­րի (Ալ­ֆորվիլ), օրհնեց Կեդ­րո­նը։

Պաշ­տօ­նական ելոյթնե­րու շար­քը բա­ցաւ Հրաչ Սի­սեռ­եան՝ Հ.Մ.Ը.Մ.-ի Կեդ­րո­նական վար­չութեան նախ­կին ան­դամ, Հ.Մ.Ը.Մ. Ֆրան­սի նախ­կին ատե­նապետ, Իմաս­տուննե­րու խոր­հուր­դի ան­դամ եւ ծրագ­րին իս­կա­կան ռահ­վի­րան։ Ան շնոր­հա­կալու­թիւն յայտնեց բո­լոր մեծ ու փոքր նուիրա­տու­նե­րուն, ինչպէս նաեւ Հայ առա­քելա­կան եկե­ղեց­ւոյ եւ Իսի-լէ-Մու­լի­նոյի քա­ղաքա­պետա­րանին։ Ող­ջունեց ան­վե­րապահ աջակ­ցութիւ­նը «հա­յերու իս­կա­կան բա­րեկամ» քա­ղաքա­պետ Անտրէ Սան­թի­նիի, ժո­ղո­վրդա­վարա­կան մաս­նակ­ցու­թեան հար­ցե­րու փոխ-քա­ղաքա­պետ Յա­րութ Ար­թիւր Խան­ճեանի եւ Հ.Մ.Ը.Մ.-ի Կեդրո­նական վար­չութեան, որոնք զօ­րավիգ կանգնե­ցան այս հսկա­յական ծրագ­րին։ Պրն Սի­սեռեան յղեց նաեւ զօ­րաւոր պատգամ մը. «Շնոր­հա­կալ եմ անոնց, որոնք մեզ կը յու­սալքէին այս ճամբուն վրայ եւ կը կար­ծէին թէ պի­տի ընկրկինք. ընդհա­կառակն, անոնք տաս­նա­պատ­կե­ցին մեր կամքն ու հա­մոզումնե­րը՝ հաս­նե­լու հա­մար հոն, ուր հա­սանք այ­սօր»։ Ան եզ­րա­փակեց՝ յստա­կաց­նե­լով, թէ կեդ­րո­նը բաց է բո­լոր հա­յերուն առ­ջեւ, առանց խտրու­թեան։

Հրաչ Սիսեռեան

Այ­նուհե­տեւ ելոյթ ու­նե­ցաւ Հու­սսամ Հա­րիրի՝ Լի­բանա­նի նախ­կին վար­չա­պետ Սաատ Հա­րիրիի որ­դին։ Ան շեշ­տեց եղ­բայրա­կան եւ անխզե­լի կա­պերը Հա­րիրի ըն­տա­նիքին եւ հա­յու­թեան՝ ու յատ­կա­պէս Հ.Մ.Ը.Մ.-ին մի­ջեւ, ոգե­կոչե­լով յի­շատա­կը իր մեծ հօր՝ ող­բա­ցեալ Ռա­ֆիք Հա­րիրիի, եւ յանձնա­ռու­թիւնը իր հօր՝ Սաատ Հա­րիրիի, որոնք սկիզ­բէն ի վեր հա­ւատա­ցին այս ծրագ­րին։

Հուսսամ Հարիրի

Փոխ-քա­ղաքա­պետ Ար­թիւր Խան­ճեան խօսք առաւ յա­նուն քա­ղաքա­պետ Անտրէ Սան­թի­նիի, որ առող­ջա­կան պատ­ճառնե­րով չէր կրցած ներ­կայ գտնուիլ։ Ան յի­շեցուց, որ Պրն Սան­թի­նի եղած է այս երա­զի իրա­կանաց­ման գլխա­ւոր հիմ­նա­սիւ­նը, ծրա­գիր մը՝ որ եզա­կի է Եւ­րո­պայի մէջ։ Պրն. Խան­ճեան եզ­րա­կացուց. «Ար­մատ նե­տելու դժուարու­թիւնը ան­ցեալին կը պատ­կա­նի. այ­սուհե­տեւ, 3000 քառ. մեթր տա­րածու­թեամբ այս կեդ­րո­նը հայ աշ­խարհի սրբա­վայր մըն է»։

Արթիւր Խանճեան

Հուսկ, եզ­րա­փակիչ խօս­քը ար­տա­սանեց Լի­բանա­նէն յատ­կա­պէս ժա­­մանած Հ.Մ.Ը.Մ.-ի Կեդ­րո­նական վարչութեան ատե­նապետ՝ Յա­կոբ Խա­չերեան։ «Այս կեդ­րո­նը պի­տի պատ­րաստէ ապա­գայի հայ մար­դը։ Յանձնե­ցէ՛ք ձեր զա­ւակ­նե­րը այս հաս­տա­տու­թեան՝ Հ.Մ.Ը.Մ.-ին, եթէ կ՚ու­զէք որ անոնք լաւ հա­յեր դառ­նան»,– յայ­տա­րարեց ան՝ լիակա­տար յա­ջո­ղու­թիւն մաղ­թե­լով այս ծրագ­րին, որ հա­մախմբման խթան պի­տի հան­դի­սանայ։

Յակոբ Խաչերեան

Մշա­կու­թա­յին բարձրո­րակ երե­կոյթ

Այս ելոյթնե­րէն ետք ցու­ցադրուեցաւ տե­սերիզ մը, որ կը ներ­կա­յաց­նէր Հ.Մ.Ը.Մ. Ֆրան­սի 50-ամեայ ան­ցեալը, ինչպէս նաեւ միու­թեան հա­մաշ­­խարհա­յին պատ­մութիւ­նը՝ 1918-ին Կոս­տանդնու­պոլսոյ մէջ իր ծնունդէն մին­չեւ այ­սօ­րուան տա­րածու­մը հա­մայն աշ­խարհի մէջ (101 մաս­նա­ճիւ­ղեր՝ 41 շրջան­նե­րու եւ 26 եր­կիրնե­րու մէջ)։

Լուսինէ Լեւոնի

Եսայի

Երե­կոյ­թը շա­րու­նա­կուե­ցաւ երաժշտու­թեամբ՝ «Տըլէ եա­ման»-ի գե­ղեցիկ կա­տարումով, մեկ­նա­բանուած Եսա­յիի կող­մէ, որ ծանօթ է «Ռո­մէօ եւ Ժիւ­լիէթ» երաժշտա­խառն թա­տեր­գութեան մէջ Փա­րիզի կոմ­սի իր դե­րով (ձայ­նասկա­ւառա­կը վա­ճառուած է եր­կու մի­լիոն օրի­նակով)։ Ինք եւս ըլ­լա­լով Հ.Մ.Ը.Մ.-ական, ան կրցաւ իր խան­դա­վառու­թիւնը փո­խան­ցել հան­րութեան։ Սոփ­րա­նօ Լու­սի­նէ Լե­ւոնի նոյնպէս հմա­յեց ներ­կա­ները Շառլ Ազ­նա­ւու­րի «Լա Պո­հեմ»-ի կա­տարու­մով։

Ամ­բողջ երե­կոյթի ըն­թացքին, «Արա­րատ» պա­րախումբը, գե­ղարուես­տա­կան ղե­կավա­րու­թեամբ Քա­թարի­նա եւ Արամ Ար­զումա­նեան­նե­րու, ներ­կա­յացուց հայ­կա­կան ծա­նօթ եղա­նակ­նե­րու վրայ հիանա­լիօրէն հա­մադ­րուած պա­րեր։ Աւար­տին, բարձրո­րակ հիւ­րա­սիրու­թիւն մը տեղի ունե­ցաւ շքեղ հանդիսասրահին մէջ։

Ար­դիական եւ բնա­պահ­ական հա­մալիր

Վարձքը կա­տա՛ր Հ.Մ.Ը.Մ. Ֆրան­սի ղե­կավար­նե­րուն, որոնք յա­ջողե­ցան կա­ռու­ցել այս հրա­շալի ար­դիական հա­մալի­րը։ Շէն­քը ծայրէ-ծայր օժ­տուած է նորարար արհեստագիտութիւններով՝ բնա­կան եւ խնա­յողա­կան ջե­ռու­ցումով եւ ջու­րի շոգիաց­ման մի­ջոցով օդափոխման հա­մակար­գով, որ կ՚ապա­հովէ յար­մա­րաւէ­տու­թիւն՝ առանց ած­խածնա­յին վնասներու։ Կա­նա­չա­պատ տա­նիք­նե­րով եւ բնա­կան նիւ­թե­րու գոր­ծա­ծու­թեամբ՝ կեդ­րո­նը կը ստեղ­ծէ կա­յուն եւ շնչող քա­ղաքա­յին մի­ջավայր մը։

Այս նոր տա­րած­քը մեծ դեր պի­տի խա­ղայ հայ հա­մայնքա­յին կեան­քի աշ­խու­ժաց­ման մէջ՝ Իսի-լէ-Մու­լի­նոյի եւ յա­րակից շրջան­նե­րու (Գլա­մար, Մէօտոն, Վանվ, Մա­լաքոֆ, Շա­թիյոն եւ այլն), ինչպէս նաեւ ամ­բողջ Ֆրան­սա­յի տա­րած­քին։ Ան կը բանայ նոր դա­րաշրջան մը Հ.Մ.Ը.Մ. Ֆրան­սի զար­գացման եւ հայ երի­տասար­դութեան նկատ­մամբ իր յանձնա­ռու­թեան՝ մար­զանքի եւ մշա­կոյ­թի ճամ­բով։

Կեց­ցէ՛ Հ.Մ.Ը.Մ. Ֆրան­սի մար­զա­կան եւ մշա­կու­թա­յին կեդ­րո­նը։

Շանթ ՈՍԿԵՐԻՉԵԱՆ

Շքեղ հանդիսասրահը

ԳՈՐԾՆԱ­ԿԱՆ ՏԵ­ՂԵԿՈՒ­ԹԻՒՆՆԵՐ

Հ.Մ.Ը.Մ. Ֆրան­սի մշա­կու­թա­յին եւ մար­զա­կան կեդ­րո­նը (9 rue Rabelais, Issy-les-Moulineaux) կ՚առա­ջար­կէ բազ­մա­զան գոր­ծունէու­թիւններ բո­լոր տա­րիք­նե­րու հա­մար։

Են­թա­կառոյցներ եւ ծա­ռայու­թիւններ.-

– Բազ­մանպա­տակ հան­դի­սաս­րահ (400 քառ. մ.).- Կեդ­րո­նի սրտին վրայ գտնուող այս սրա­հը կրնայ ըն­դունիլ 380 հոգի (նստած՝ 260) տօ­նական եւ մշա­կու­թա­յին ձեռ­նարկնե­րու հա­մար (հար­սա­նիք­ներ, կնունքներ, դա­սախօ­սու­թիւններ, ցու­ցա­հան­դէսներ, հա­մերգներ, պա­րի դա­սըն­թացքներ, ըն­դունե­լու­թիւններ, պա­րահան­դէսներ եւ այլն):

– Սկաու­տա­կան բա­ժին.- Յա­տուկ են­թա­կառոյցներ՝ սկաուտնե­րը ըն­դունե­լու եւ անոնց ու­սուցումն ու զար­գա­ցու­մը ապա­հովե­լու հա­մար։

– Ճա­շարան.- Հա­ճելի վայր մը սնունդի հա­մար։

– Գլխա­ւոր մար­զասրահ (1200 քառ. մ.).- Շրջա­նային չա­փանիշ­ե­րուն հա­մապա­տաս­խան, օժ­տուած՝ 300 հան­դի­սատեսի համար նախատեսուած աս­տի­ճանա­ւոր նստա­րան­նե­րով։ Հոն կա­րելի է կի­րար­կել՝ պաս­քեթպոլ, ֆութսալ, վո­լեյ­պոլ, հանտպոլ, պատ­մինթոն եւ փինկ-փոնկ:

– Կա­յանա­տեղի.- Ստոր­գետնեայ՝ 60 ինքնա­շար­ժի հա­մար։

– Մար­զա­կան եւ կազդուրիչ գոր­ծունէու­թիւններ.- Բա­ցի խմբա­յին մար­զա­ձեւե­րէն, կեդ­րո­նը կ՚առա­ջար­կէ հե­տեւեալ­նե­րը՝ որա­կաւո­րուած մար­զիչնե­րով.

– Քունկ-ֆու (պա­տանի­ներու հա­մար),

– MMA (Խառն մարտական արուեստներ — 14 տա­րեկա­նէն վեր),

– Եոկա, սալ­սա եւ փի­լաթես։

Կապ եւ ամ­րագրումներ (réservations).- Կեդ­րո­նը կը հիւ­րընկա­լէ նոր աշ­խա­տանոց­ներ եւ ձեռ­նարկներ ամ­բողջ տա­րուան ըն­թացքին։ Օրա­ցոյ­ցը պար­բե­րաբար կը թար­մա­ցուի ըն­կե­րային ցան­ցե­րու եւ պաշ­տօ­նական կայ­քին վրայ։ Կայ­քէջ՝ www.homenetmen.fr/le-centre/

Դա­սըն­թացքնե­րու ար­ձա­նագ­րութիւն՝ www.homenetmen.fr/contact

Սրա­հի կամ ձեռ­նարկնե­րու ամ­րագրում.- կապ հաս­տա­տել Պրն Հար­միկ Օհա­նեանին հետ՝ 07-61-35-84-89 թիւին։

Տեսանիւթ՝ https://youtu.be/whdTpLOlR2I

Շ. Ո. ■