«Երանի՜ անոնց, որ քաղցն ու ծարաւն ունին արդարութեան, որովհետեւ անոնք պիտի յագենան»։ (Մատթ․ 5։6)

Չորեքշաբթի, Փետրուար, 19-ին, Երուսաղէմի պատրիարքներն ու Եկեղեցիներու հոգեւոր պետերը Երուսաղէմի քաղաքապետարանին կողմէ Հայոց պատրիարքութեան գոյքի բռնագանձման որոշումը դատապարտող յայատրարարութեամբ հանդէս եկած են եւ պահանջած են անյապաղ միջամտութիւն։

«Մեծ մտահոգութեամբ մենք՝ Երուսաղէմի պատրիարքներս ու Եկեղեցիներու հոգեւոր պետերս մեր զօրակցութիւնը կը յայտնենք Երուսաղէմի Հայոց պատրիարքութեան, անոր դէմ՝ Երուսաղէմի քաղաքապետարանի արձակած անարդար բռնագանձման հրամանի առնչութեամբ՝ պահանջելով արդարադատութիւն։ 

Հայոց պատրիարքութեան դէմ ձեռնարկուած գործողութիւնները, որոնք հիմնուած են քաղաքապետարանի հարկի չստուգուած եւ ահռելի հարկային պարտքի վրայ, իրաւաբանօրէն կասկածելի են եւ բարոյապէս անընդունելի։ 

Անհնար է երեւակայել, որ քրիստոնէական հաստատութիւնները, որոնց առաքելութիւնը դարերէ ի վեր եղած է հաւատքի պաշտպանութիւնը, համայնքներուն ծառայելը եւ Սուրբ Երկրի սրբազան ժառանգութիւնը պահպանելը, այժմ կը բախին գոյքի բռնագանձման սպառնալիքին՝ Իսրայէլի վարչական միջոցներով, որոնք կ՚անտեսեն պատշաճ ընթացակարգերը։ Յատկապէս տագնապալի է քաղաքապետարանի՝ պարտքի որոշումը պարտադրելու փորձը՝ առանց դատական վերահսկողութեան եւ ի հեճուկս այսօրինակ հարցերու շուրջ բարեխղճօրէն բանակցելու համար ստեղծուած կառավարական յանձնաժողովին։ Այս անխոհեմ քայլը վտանգի կ՚ենթարկէ Հայոց պատրիարքութիւնը եւ կը ստեղծէ նախադէպ, որ կրնայ վտանգի ենթարկել նաեւ քրիստոնէական ամբողջ հաստատութիւնները Սուրբ Երկրին մէջ։ 

Սոյն գործողութիւնը կը խարխլէ կրօնի ազատութիւնը, որ միւս բոլոր իրաւունքներու հիմքն է, քանի որ գոյքի բռնագրաւումով կը փորձեն վտանգի ենթարկել Հայ եկեղեցւոյ գոյութիւնը՝ զրկելով զայն գործունէութեան անհրաժեշտ տնտեսական միջոցներէն եւ հայ համայնքն ալ՝ իր եկեղեցւոյ հովուական խնամքէն։

«Եթէ անդամ մը կը տառապի, բոլորը միասին կը տառապին» (Ա Կորնթացիս 12։26)։ Եկեղեցւոյ մը թիրախաւորումը յարձակում է բոլորին վրայ, եւ մենք չենք կրնար լռել այնքան ատեն, որքան որ Սուրբ Երկրին մէջ Քրիստոսին ծառայելու՝ քրիստոնէական ներկայութեան հիմքերը սասանուած են։ Մենք կոչ կ’ընենք վարչապետ Պենիամին Նեթանեահուին, Ներքին գործոց նախարար՝ Մոշէ Արպէլին եւ նախարար Ցախի Հանեկպիին անյապաղ միջամտելու, յետս կոչելու բռնագրաւման բոլոր ընթացակարգերը եւ ապահովելու բանակցութիւններու վերսկսումը վերոնշեալ կառավարական յանձնաժողովի շրջանակին մէջ՝ արդարութեան ոգիով այս հարցի խաղաղ լուծման հասնելու համար։

Թող թագաւորէ արդարութիւնը եւ թող Սուրբ Երկիրը մնայ հաւատքի փարոս սերունդներու համար»,– ըսուած է Երուսաղէմի պատրիարքներու եւ Եկեղեցիներու հոգեւոր պետերու միասնական յայտարարութեան մէջ։