Հայաստանի Հանրային ձայնասփիւռի հարցազրոյցը՝ Սփիւռքի գործոց յանձնակատար Զարեհ Սինանեանի հետ

– Հայրենադարձութիւն եւ Սփիւռքի հետ յարաբերութիւններ. ո՞ր փուլում են դրանք այսօր։

Զարեհ Սինանեան – Հայաստանի և Սփիւռքի միջեւ յարաբերութիւնները շարունակաբար փոխւում են։ Այսօր մենք գտնւում ենք միմեանց աւելի լաւ ճանաչելու փուլում, եւ այս գործընթացը կարող է երկար տեւել։ Սփիւռքին Հայաստանը հասկանալը միշտ էլ բարդ խնդիր է եղել։

Սփիւռքն իր հանգստաւէտ գօտին է գտել՝ Հայաստանի լրջագոյն խնդիրները չնկատելով։

– Որո՞նք են Սփիւռքի բացթողումները Հայաստանի առջեւ ծառացած խնդիրների սրման ժամանակահատուածում։

Զ.Ս. – Լռութիւնը, աչք փակելը բերեցին այս իրավիճակին։ Սփիւռքի որոշ հատուածների անտարբերութիւնն ու չէզոքութիւնը թոյլ չեն տուել ժամանակին արձագանգել Հայաստանի առջեւ ծառացած մարտահրաւէրներին։

«Նոր Սփիւռք». իրականութի՞ւն, թէ՞ յօրինուածք

– Արդեօք գոյութիւն ունի՞ «նոր Սփիւռք» հասկացութիւնը, եւ ի՞նչ դեր ունի գլխաւոր յանձնակատարը այդ նոր Սփիւռքի ձեւաւորման գործընթացում։ 

Զ.Ս. – Շատ շնորհակալ եմ նման բնորոշման համար, սակայն նոր Սփիւռքը ձեւաւորուել է ինքնաբուխ եւ վաղուց։ Դրա կայացման գործում էական դեր են խաղացել վերջին տարիներին ի յայտ եկած չհասկացուածութիւններն ու գաղափարական տարբերութիւնները։ Սփիւռքի նոր շերտը բնութագրւում է աւելի քննադատական մօտեցմամբ եւ աշխուժ մասնակցութեամբ՝ ի տարբերութիւն աւանդական կառոյցների։

– Որո՞նք են Հայրենադարձութեան հեռանկարներն ու մարտահրաւէրները։

Զ.Ս. – Եթէ մեր երկիրը դառնայ այնպիսին, որտեղ ապահովութեան եւ այլ հարցեր կայուն լուծումներ կ՚ունենան, ապա համոզելու կամ ռազմավարութիւն մշակելու կարիք չի լինի։

– Սիրիահայերի տեղափոխման հարցը։

Զ.Ս. – Սիրիահայերին Հայաստան տեղափոխելը ինքնին խնդիր չէ։ Խնդիրն այն է, թէ ինչպէս նրանց ապահովել օթեւանով եւ աշխատանքով։ Գրասենեակը կապ է պահում սիրիահայ համայնքների հետ։

Ցանկութեան դէպքում մենք կարող ենք նրանց Հայաստան տեղափոխելու հարցը լուծել։ Բացի այդ, Ընկերային հարցերի նախարարութեան հետ համատեղ մտածում ենք սիրիահայերի համար ժամանակաւոր թաղամաս կառուցելու մասին։ Այս նախաձեռնութիւնը պահանջում է տարբեր ուղղութիւններով հետեւողական աշխատանք։