Ուրֆայի Գերմուշ գիւղի պատմական Սուրբ Աստուածածին եկեղեցւոյ գմբէթը վերջերս փլած է։ Նախորդ տարիներուն տաճարի ներսն ու շրջակայքը օր ըստ օրէ կ՚աւերուէին գանձագողերու ձեռքով, որ պատճառ դարձած է կառոյցին արագ փլուզումին:

Նկատի ունենալով, որ 2017-էն ի վեր ո՛չ մէկ քայլի ձեռնարկուած է եկեղեցւոյ վերականգնման համար, աւելի՛ն, հին գերեզմանոցները կը քանդուին նոր շէնքեր կառուցելու նպատակով, կասկածի տեղ չի մնար, որ տաճարը միտումնաւոր թողած են բախտի քմահաճոյքին:

Ծանօթ է, որ Գերմուշի մէջ,– որ մինչև 1915 թուականը Ուրֆայի շրջանի ամէնէն մեծ գիւղն էր,– եկեղեցիէն բացի կը գործէր նաեւ դպրոցը, ուր կ՚ուսանէր աւելի քան 100 աշակերտ։ Առկայ է արձանագրութիւն, ուր նշուած է, որ եկեղեցին վերանորոգուած է 1881-ին։ Տաճարը Հայերուն իբրեւ աղօթատեղի ծառայած է մինչեւ 1915 թուականը, իսկ այնուհետեւ որպէս «նուէր» յանձնուած է Սիւմեր փաշային, որ կը ղեկավարէր Համիտեան գունդերը։

Ուրֆայի քաղաքապետարանի կայքէջին վրայ եկեղեցւոյ տարեթիւին եւ հայկական ժառանգութեան մասին ոչինչ նշուած է։ ■