Մարդկային իրաւանց միութեան Տիգրանակերտի մասնաճիւղը Հայոց ցեղասպանութեան108-րդ տարելիցին նուիրուած ձեռնարկ մը կազմակերպած է եւ այդ ծիրին մէջ ոգեկոչած Դանիէլ Վարուժանի յիշատակը։ Լուրը հաղորդած է Akunq.net՝ յղում ընելով թրքական լրասփիւռներուն։
Աղբիւրին համաձայն՝ միջոցառման մասնակիցները համախմբուած են Տիգրանակերտ նահանգի Ռեզան (Պաղլար) գաւառը գտնուող Քոշուեօլու հանրապարտէզին մէջ՝ կեանքի իրաւունքը խորհրդանշող յուշակոթողին մօտ եւ արծարծած Թուրքիոյ մէջ անհետացած անձանց, անոնց մէջ՝ արեւմտահայ բանաստեղծ Դանիէլ Վարուժանի ճակատագրին հարցը։ Անոնց կողմէ ցուցադրուած լուսանկարներու կարգին տեղ գտած է նաեւ Դանիէլ Վարուժանի 1915-ի պատկերը։
Մարդկային իրաւանց միութեան անհետացածներու հարցերու յանձնաժողովի անդամ Ֆըրաթ Աքտենիզ, «Չենք մոռցած, պիտի չմոռնանք» շեշտելով, ներկայացուցած է Վարուժանի պատմութիւնը։ Ան մասնաւորապէս նշած է, որ Վարուժան 1915-ին ձերբակալուած անձերուն մաս կը կազմէր, զայն նախ տարած են մօտակայ ոստիկանատուն, ապա՝ փոխադրած կեդրոնական բանտ։
Աքտենիզ աւելցուցած է․ “1915-ի Ապրիլ 25-ին ձերբակալուածներուն առանց որեւէ տեղեկութիւն տալու՝ Հայտարփաշա կայանէն մասնաւոր գնացքով զանոնք ղրկած են Անգարա։ 158 հոգինոց խումբը տարուած է Չանքըրը, իսկ 92 հոգինոցը՝ Այաշ։ Ձերբակալուած այդ անձերէն 174-ը ներկայիս շիրմաքար մ՚իսկ չունի։ Ապրիլ 24-ին Պոլսոյ մէջ ձերբակալուած այդ դէմքերէն մէկն ալ եղած է «չքաւորութեան, ճակտի քրտինքի, աշխատանքի, սիրոյ եւ հայրենասիրութեան երգիչ»Դանիէլ Վարուժանը”,– ըսած է ան։
Աւարտին բանախօսը ներկայացուցած է Դանիէլ Վարուժանի կենսագրութիւնը։
