Յուլիս 31-ին, Իտալիոյ Սիսիլիոյ շրջանի Մեսսինա նահանգի Ռոքալումերա քաղաքին մէջ բացումը կատարուած է միջազգային ազգագրական փառատօնին։ Բացման հանդիսաւոր արարողութեան ընթացքին Արցախի Պարի եւ ազգային նուագարաններու պետական համոյթները մասնակցած են պարզելով Հայաստանի եւ Արցախի դրօշակները։

Քանի մը տասնեակ երկիրներէ մշակութային պատուիրակութիւնները իրենց ազգային տարազներով մասնակցած են շքերթին, ուր հնչած է նաեւ Հայաստանի Հանրապետութեան փառերգը։

Արցախի մշակոյթի պահպանման կեդրոնէն հաղորդած են, թէ Արցախի դրօշին ծածանման ակնառու պահը յուզիչ եւ խորհրդանշական էր պատուիրակութեան համար, իբրեւ մշակութային ինքնութեան եւ շարունակականութեան հաստատում միջազգային հարթակին վրայ։ «Մեր պատուիրակութիւնը արժանացաւ հանդիսատեսի ջերմ ընդունելութեան եւ մեծ հետաքրքրութիւն ստեղծեց կազմակերպիչներու ու միջազգային գործընկերներու շրջանակին մէջ»,– ի միջի այլոց, նշուած է Կեդրոնի հրապարակած հաղորդագրութեան մէջ։

Յառաջիկայ օրերուն Արցախի համոյթները Իտալիոյ շարք մը քաղաքներուն մէջ հանդէս պիտի գան համերգային յայտագրերով՝ ներկայացնելով Արցախի աւանդական երաժշտութիւնն ու պարարուեստը բազմազգ հանդիսատեսին։