Իրանի Շիրազ քաղաքին մօտ գտնուող Փերսեփոլիս պատմական յուշահամալիրի տարածքին Սեպտեմբեր 6-ին տեղի կ՚ունենայ Հայաստանի ազգային Ֆիլհարմոնիք նուագախումբին բացօթեայ համերգը, որ նուիրուած է նուագախումբին հիմնադրութեան 100-ամեակին։

Աննախադէպ այս իրադարձութեան ներկայ կը գտնուին Հայաստանի Կրթութեան, գիտութեան, մշակոյթի ու մարզանքի նախարար Ժաննա Անդրէասեան, Իրանի Մշակութային ժառանգութեան, զբօսաշրջութեան եւ ձեռարուեստի նախարար Սեյետ Ռեզա Սալեհի Ամիրի, ինչպէս նաեւ բարձրաստիճան այլ պաշտօնատարներ։

Այս բացառիկ համերգին մենակատարն է հռչակաւոր թենոր Լիպարիտ Աւետիսեան, որուն կատարողութեամբ կը հնչեն Սայեաթ Նովայի «Իմ քամանչա» արիան՝ Ալեքսանդր Յարութիւնեանի «Սայեաթ Նովա» օփերայէն, Կոնստանդին Պետրոսեանի «Հայաստան» եւ Ռոբերտ Ամիրխանեանի «Երազ իմ երկիր հայրենի» երգերը։ Կը հնչէ նաեւ Ռուհոլլահ Խալեկիի «Ո՜վ Իրան» ստեղծագործութիւնը։ Իսկ երեկոյթին իւրայատուկ փայլ կու տայ Արամ Խաչատրեանի «Սիմֆոնիա թիւ 2»-ի կատարումը։

Նուագախումբը կը ղեկավարէ Էդուարդ Թոփչեան։

Նշենք, թէ Հայաստանի ազգային ֆիլհարմոնիք նուագախումբին նախորդ այցելութիւնը Իրան տեղի ունեցած է 25 տարի առաջ՝ 2000 Փետրուար 5–26,  Թեհրանի «Վահտաթ» համերգասրահին մէջ, ուր ներկայացուած է Լորիս Ճգնաւորեանի «Ռոստամ եւ Սոհրապ» օփերան՝ երաժիշտին ղեկավարութեամբ: